A manifestación de axentes forestais e medioambientais convocada por CIG, CCOO, CSIF e UGT para o martes 12 de agosto queda suspendida tras os compromisos de Medio Rural e Medio Ambiente
As organizacións sindicais asistimos o xoves 7 a unha xuntanza coa Conselleira do Medio Rural, na que estaban presentes o D.X. de Montes e o Secretario Xeral Técnico. Expuxemos as demandas sindicais e os incumprimentos da Xunta, en cuestións como o regulamento de funcións, as condicións de traballo, a necesidade de incrementar postos, as substitucións, etc., finalmente acadamos o compromiso verbal da Conselleira, de que comezaremos as negociacións na segunda semana de setembro, ao que engade como acto de boa vontade, o compromiso do incremento de 1 nivel para tódolos axentes de Medio Rural para o ano 2026.
Por outra banda, o mesmo xoves 7 recibimos a comunicación por parte da Consellería de Medio Ambiente e Cambio Climático de sentarse cos sindicatos a principios de setembro, na que instaremos á Consellería a aplicar as mesmas medidas que en Medio Rural.
Vistos os movementos que realizan as dúas consellerías, xunto co actual nivel de incendios, CIG, CCOO, CSIF e UGT acordamos desconvocar a manifestación do martes 12 e abrir o momento da negociación.
Tentaremos que a xuntanza con Medio Ambiente e con Medio Rural sexa o mesmo día, e tentaremos sumar tamén á Consellería de Industria e Facenda. E comprometémonos a que se en troques de negociar, o que fan é dilatar, volveremos á carga.
