Asistimos á Comisión de Persoal do 1 de agosto para aprobar as modificacións de tres relacións de postos de traballo (RPT) que, con cousas boas e malas, tiñan un nexo en común: o incremento do complemento específico de entre 5.000 e 6.000 € para unha elite de postos de niveis 28 e 30, das escalas de letrados/as e de finanzas, co argumento da necesaria homologación cos seus equivalentes no Consello Consultivo e co Consello de Contas.
Esta vez foron as seguintes: Consellería de Presidencia, Xustiza e Deportes; Consellería de Facenda e Administración Pública, e Atriga. Todas elas seguen a liña que xa previamente marcou a Presidencia da Xunta.
Esta homologación por arriba (niveis 28 e 30), de letrados e finanzas, foi aprobada na Lei 4/2024, de orzamentos xerais da Comunidade Autónoma de Galiza para o ano 2025, imposta sen previa negociación coa representación sindical do persoal.
Na CIG non nos opoñemos á suba salarial dos empregados e empregadas públicas, pero si nos opoñemos a que estas subas só lles afecten a un grupo de postos.
As propostas quedaron aprobadas, todas elas co voto en contra da CIG. Estas foron as votacións:
- RPT de Atriga: CIG en contra. CCOO abstención. CSIF=UGT a favor
- RPT de Facenda: CIG: en contra. CCOO=UGT abstención. CSIF en contra
- RPT C. Presidencia: CIG en contra. CCOO=UGT abstención. CSIF a favor
Dende a CIG defendemos que a totalidade de postos e escalas da administración xeral e especial, de niveis altos e niveis baixos, sexamos tamén homologadas e homologados aos seus equivalentes co Parlamento, co Consello Consultivo ou co Consello de Contas.
