Na comisión de seguimento abordouse a modificación de horarios con escasos avances, pero co compromiso de avanzar na mellora das condicións laborais e na xubilación anticipada do persoal.
Na xuntanza celebrada o 3 de novembro de 2025 a Consellería do Mar comprometeuse a colaborar no procedemento iniciado pola CIG en abril do 2024 en base ao Real Decreto Lexislativo 8/2015, de 30 de outubro, para a consecución dos coeficientes redutores de xubilación do persoal do Servizo de Gardacostas de Galiza.
Alegrámonos de que a Administración se poña neste caso do lado do persoal nesta xusta loita pola xubilación anticipada, recoñecéndonos ademais a oportunidade de ter presentado a solicitude baixo a anterior regulación cun procedemento que resulta máis vantaxoso.
Orde de prestación de servizos e negociación de horarios
A Administración comprometeuse a unha nova reunión nun prazo de dez días, aínda que na reunión de hoxe non se produciron avances significativos. Consideramos que o punto clave é acadar un consenso nas carteleiras, verdadeiro motivo do bloqueo, polo que reiteramos que é necesario reforzar o cadro de persoal e cubrir as vacantes e denunciamos que non se están a cumprir a orde na sua totalidade nin as 60 horas de descanso semanal obrigatorias.
• Inclúen as 60 horas de descanso na orde, pero atráncase a definición de “semana”.
• Acéptase ampliar a compensación por prolongación de xornada: 2 horas en mañá/tarde, 2 horas 30 minutos en noite e 3 horas en festivo.
• Non se acepta a redución de quendas mensuais, nin de noites, nin de fins de semana.
• Acéptase pagar a 120 € as xornadas especiais, mais sen incluír os festivos.
• Actualízase o complemento específico, pero sen melloras adicionais.
EPI`s e uniformes
A Consellería anunciou a ampliación do orzamento para roupa de traballo, que pasa de 30.000 a 75.000 euros. Aínda non se confirmou se será posible arrastrar puntos entre exercicios, pero incluirase no prego a obriga de manter un stock de reposición e dotación para o novo persoal.
RPT: segunda actividade e xefaturas
Insistimos na necesidade de:
• Ampliar os postos de segunda actividade.
• Incluír a observación nestes postos para especificar que o salario é do posto de orixe incluídos todos os complementos.
• Abrir á escala operativa os postos de xefatura.
• Revisar a necesidade de creación de prazas nas bases para poder respectar os dereitos laborais do persoal.
Procesos selectivos e grupo B
En canto resolución e toma de posesión do concurso de traslados e procesos selectivos está en man da Dirección Xeral de Emprego Público sen que en Mar teñan explicación do motivo do atraso.
Sobre a integración no grupo B, a consellería deu resposta a demanda sindical e trasladou a intención de incluír na Lei de medidas de 2026 unha modificación para situar as especialidades de patrón e mecánico da escala operativa no grupo B, de acordo coa titulación de técnico/a superior esixida. Porén, acompáñano dunha disposición derrogatoria quinta, que na práctica impide a súa efectividade, mantendo o persoal no C1 á espera dunha regulación que non se esixe a ningún outro subgrupo na Administración.
Na CIG denunciamos que esta manobra reproduce o mesmo bloqueo que padecen outras escalas do grupo B dende hai máis dunha década, o que nega o recoñecemento profesional e económico debido ao persoal.
A CIG presenta alegacións ás leis con novas propostas
A CIG vén de presentar unha batería de alegacións ao anteproxecto da Lei de medidas e á Lei de Orzamentos de 2026, incluíndo tamén novas propostas para mellorar a regulación do Servizo de Gardacostas de Galiza.
Proposta para incluír Gardacostas na Lei de Emerxencias de Galiza
A CIG presentou unha proposta para modificar a Lei 5/2007, de emerxencias de Galiza, co obxectivo de incluír directamente o Servizo de Gardacostas como servizo esencial de emerxencias. O recoñecemento legal permitiría mellorar a resposta ante emerxencias climáticas, naturais e de salvamento, consolidando o carácter estratéxico deste servizo.
Proposta para a consideración de servizo esencial Lei de Orzamentos para 2026
A ausencia de referencia expresa no artigo 13 da Lei de Orzamentos deste servizo complica a cobertura áxil de vacantes e substitucións.
Proposta de supresión do artigo 21.d
Para evitar que os importes dos complementos específicos adicionais podan ser reducidos ou eliminados pola Administración.
Proposta para que a Administración da Xunta impulse formalmente o procedemento de xubilación anticipada ante o Estado
Coa engádega dun artigo na Lei 2/2004, do 21 de abril, pola que se crea o Servizo de Gardacostas de Galiza.
Lembra que teremos unha nova comisión en 10 días, Se queres engadir propostas ou trasladar dúbidas, contacta coa CIG-Autonómica.
A participación de todo o persoal é clave para seguir avanzando!