O CGTD de Pontevedra non está considerado un centro de atención directa a usuarios a pesares de que nel hai un internado no que conviven persoas menores e maiores de idade.

Isto complica a cobertura de baixas ou permisos xa que primeiro hai que sacalas a comisión de servizo e logo si non a solicita ninguén pedir autorización a Orzamentos para cubrila recorrendo ás listas de substitucións, polo que de conseguirse a cobertura esta non se fai efectiva ata 8/10 días despois de producirse o feito, e como as baixas tardan moito en cubrirse isto dificulta moito a atención axeitada aos usuarios.

Neste centro almorzan, xantan e cean de domingo a noite a venres mediodía. Xantan diariamente entre 130/140 comensais e cean sempre máis de 100. Ademais o internado ten 4 andares con 14 habitacións dobres por andar e 8 baños en cada un deles.

O persoal asignado ao centro no departamento de cociña e gobernantía son: 1 oficial 1º cociña, 2 oficiais 2º cociña, 2 axudantes de cociña (quenda de mañá: 1 of 1, 1 of 2º e 1 axudante e quenda de tarde: 1 oficial 2 e 1 axudante) e 8 camareiras limpadoras. Cando hai baixas sen cubrir, sobre todo entre as camareiras limpadoras, dificultase moito o poder facer todo o traballo nas habitacións en condicións óptimas e provoca unha sobrecarga no persoal presente que en varias ocasións leva a producir novas incapacidades temporais.

Por isto a CIG ven de solicitar á Presidencia da Xunta de Galiza, de quen depende o centro, á Dirección Xeral de Emprego Público, de quen depende a xestión dos chamamentos das listas, así como á propia directora xeral na Mesa Xeral do luns 19 de xaneiro, que a efectos de cobertura das prazas por incapacidade temporal ou outras circunstancias este centro teña a mesma consideración que os centros de ensino e de asistidos.