A Consellaría do Medio Rural informou da planificación da cobertura das prazas do SPIF de cara á presente campaña. A intención que teñen é dar solución aos graves problemas producidos en anos anteriores, nos que se chegou a unha situación de verdadeiro caos nos chamamentos en plena vaga de lumes no 2025.
A Secretaría Xeral Técnica da Consellaría do Medio Rural convocounos o 5 de marzo de 2026 a unha xuntanza, onde nos forneceu distintas informacións sobre a campaña actual.
Planificación da cobertura de prazas
Segundo a información facilitada na xuntanza, os obxectivos da Consellaría son:
- Que todas as prazas estean cubertas o 15 de xuño
- Que todo o persoal estea formado nesa data, incluíndo a formación operativa e a formación específica en prevención de riscos laborais.
- Reducir os prazos, tanto na tramitación dos procedementos como nas solicitudes.
Calendario orientativo previsto
| Data | Actuación prevista |
| 18 de marzo | Publicación no DOG da toma de posesión da segunda tanda da estabilización (prazo até o 6 de abril). |
| 20 de marzo | Publicación das comisións de servizo do 100% das prazas vacantes. Prazo de solicitude até o 24 de marzo. Novo modelo único de solicitude con elección por orde de preferencia. |
| 25 - 27 de marzo | Proposta de resolución das comisións de servizo. |
| 1 de abril (estimado) | Resolución das comisións de servizo. |
| 13 de abril | Incorporación aos postos das comisións de servizo. |
| A partir do 6 de abril | Chamamentos das listas para cubrir todas as prazas, con chamamentos sucesivos. |
| Semana do 11 de maio | Previsión de finalización da cobertura das prazas. |
| A partir do 11 de maio | Chamamentos puntuais das listas unicamente por baixas, xubilacións ou incidencias. |
Trámitación das coberturas
Ademais, dende a Consellaría indicouse o seguinte:
- Están traballando nun sistema para axilizar os chamamentos.
- Valoran posibilitar o acceso a formación específica previa para o persoal das listas.
- Solicitan que o persoal vaia preparando o certificado médico.
Valoración da CIG
Esta información da Secretaría Xeral Técnica constitúe un punto de partida positivo. Porén, consideramos imprescindible, para garantir o bo funcionamento do servizo, o respecto aos dereitos laborais e a seguridade:
- Recuperar o aviso previo nos chamamentos (en todos os casos).
- Negociar o plan formativo.
- Convocar de inmediato todas as comisións de seguimento dos acordos (bombeiras forestais, técnicas e axentes).
- Estender os dereitos laborais do acordo do persoal funcionario ao persoal fixo-descontinuo.
Así mesmo, é necesario desbloquear de inmediato a situación do grupo B, para posibilitar a toma de posesión do persoal axente técnico ambiental e evitar o colapso do proceso por denuncias xudiciais, así como eliminar xa o C2.
