Na Mesa Sectorial do xoves 16 de xullo, tratáronse as convocatorias de diversos procesos selectivos: enxeñaría agronómica e informática (A1), e enxeñaría técnica agrícola, obras públicas e arquivos (A2). Viña tamén o proceso selectivo de persoal veterinario, pero non enviaron a documentación polo que foi retirado da orde do día (probablemente quede para a semana que ven).
Os cinco procesos selectivos, que foron enviados ao sindicato con pouca antelación á Mesa, teñen en común que a súa forma de acceso é a oposición, teñen exames tipo test e tipo temas (cun peso deste exercicio igual á suma dos demais: 36-14-50 puntos), promoción interna do 25% conxunta con acceso libre, e a parte específica do programa entra en todos os exercicios.
A CIG defendeu que a forma de acceso sexa concurso-oposición, a supresión do exercicio de temas (ou alternativamente a súa conversión nun suposto práctico test, e de mantelo, que o seu peso fose a metade dos exercicios test por ser de corrección subxectiva), promoción interna separada e co 50% da oferta, que cada exercicio verse sobre partes diferentes do programa (para non ter que estudar o mesmo dúas veces).
En canto ás escalas que poden participar na promoción interna, en A1-informática só permiten participar a A1 e A2 de corpos xerais e á escala de A2-informática. Isto vai en contra do que fan para as outras catro convocatorias (as enxeñarías), ás que pode participar o persoal de calquera corpo ou escala tanto de administración especial como xeral, do mesmo e inferior subgrupo. A CIG defende que en todos os casos, e sempre con reciprocidade, se aplique a promoción interna vertical e horizontal como o que fan para as enxeñarías.
En canto ao programa, en todos eles a parte común son normas de dereito positivo. Pero na parte específica temos uns procesos nor que son normas de dereito positivo (enxeñaría agronómica e agrícola), outros nos que son unha mestura con temas (obras públicas), e outros nos que son todo ou maioritariamente temas (informática e arquivos). A CIG defende que sempre sexan normas de dereito positivo e cando non sexa posible (temas), que editen manuais ou polo menos referencias bibliográficas, ao que sempre se opón a Xunta.
Descargar borradores que foron á MSF do 16/07/26:
