Novas por contido

A raíz de varias sentenzas do Tribunal de Xustiza da Unión Europea (TXUE) e de varios xulgados, estes días está a ter repercusión mediática unha serie de asuntos que afectan ao persoal que temporal ou interinamente desempeña postos de traballo nas Administracións Públicas.

En primeiro lugar facer constar que hai unha diferenza entre persoal laboral, por unha banda e persoal funcionario interino ou estatutario, por outra. Compre diferencialo porque no caso das indemnizacións por cese afectan ao persoal laboral temporal, e pode, de aí que animemos a presentar demandas, ao persoal funcionario interino.

E no caso da indefinición, esta xa estaba contemplada na normativa laboral para o persoal laboral pero non para o persoal funcionario interino, aínda que polo que se desprende das sentenzas e polo seu resultado, sería de escasa eficacia.

E a maiores de ter o foco mediático onde non se distinguen ben as distintas situacións, outro factor distorsionador como son as campañas dalgúns sindicatos para captar afiliación prometendo “reclamar a fixeza”, a “estabilidade no emprego” e “indemnizacións maiores que as que corresponden”, levan a moitos compañeiros/as a facerse unha idea errónea do que acontece.

Paso a paso:

1. INDEMNIZACIÓNS POR CESE

Derivado dalgunhas sentenzas do TXUE xurde a posibilidade de reclamar indemnizacións por cese do contrato laboral ou do nomeamento interino.

Non sabemos aínda como vai responder a Xustiza cando se comecen a presentar masivamente as demandas, nin si vai haber cambios normativos cando haxa goberno, polo que de entrada animamos a todo aquel persoal laboral temporal que teña cesado na súa relación laboral a que consulte a oportunidade de reclamar unha indemnización.

No caso do persoal funcionario interino dicimos o mesmo, coa cautela de que no caso de persoal laboral as indemnizacións están contempladas pero no caso de persoal funcionario non existe indemnización por cese da relación administrativa.

Somos partidarios de explorar esta vía e por iso a nosa asesoría xurídica está a disposición de todos/as os/as afiliados/as para levar isto adiante.

2. INDEFINICIÓN

Primeiro aclarar que indefinición non significa fixeza como vemos que anda predicando algún sindicato e que ser declarado indefinido nunha Administración Pública ten os mesmos efectos que ser persoal temporal, ou por equivalencia interino. Un traballador ou traballadora é indefinido ata que a praza sexa cuberta polos procedementos regulamentarios de provisión de postos (concurso de traslados ou toma de posesión de persoal de novo ingreso).

O Estatuto Básico do Empregado Público (EBEP) só marca unha excepción aplicable á posibilidade de ter procesos de consolidación para os postos que estean cubertos temporal ou interinamente dende antes de 1 de xaneiro de 2005.

As prazas de persoal que foi declarado indefinido con posterioridade a 2005 saen a concurso de traslados e a tomas de posesión, polo tanto a garantía de permanecer no posto e a mesma que a do persoal laboral temporal ou a dos funcionarios interinos.

En relación a sentenza do TXUE onde se declara a un traballador estatutario como indefinido non fixo, e polo tanto sería aplicable ao persoal funcionario interino, estamos no caso de encadeamentos de contrato para o mesmo posto, máis propio do persoal estatutario do SERGAS que da Administración da Xunta de Galiza, onde non se dan estes casos senón  interinidades en prazas vacantes ou substitucións, e só no caso de acúmulos de tarefas que excedan o establecido legalmente se podería dar.

Tamén neste caso a nosa asesoría está a disposición de todos/as os/as afiliados/as para estudar cada caso e ver as posibilidades de reclamación.

Outras novas recentes

Xoves, 02 Outubro 2025

Persoal non docente de Educación mobilízase por unhas condicións de traballo dignas

Persoal non docente da administración e servizos dos centros de ensino concentrouse na tarde deste mércores, día 1 de outubro, diante das xefaturas territoriais de Educación para reclamar a negociación dun acordo de condicións de traballo que teña en conta as características específicas da prestación deste servizos, a creación dunha estrutura profesional nas cociñas, e...
Xoves, 09 Outubro 2025

O Supremo pronúnciase sobre o conflito colectivo das tarefas de PSX

O Tribunal Supremo considera que a demanda polas tarefas de limpeza das/os psx ten que xulgarse como conflito colectivo e devolve o caso ao Tribunal Superior de Xustiza de GalizaA CIG interpuxo no TSXG un conflito colectivo en desconformidade coa interpretación que o Consorcio dá á cláusula do Acordo de Integración e  coa práctica do Consorcio Galego de Servizos de...
Martes, 30 Setembro 2025

Campaña de vixilancia da saúde 2025/2026 para persoal non docente de centros de ensino

Aplicable ao persoal docente e non docente (funcionario e laboral) en activo, que presta servizos nos centros docentes públicos non universitarios, dependentes da Consellería de Educación, Ciencia, Universidades e Formación Profesional. A inscrición ten carácter voluntario, polo que se realizará previa solicitude das persoas interesadas conforme ás instrucións deste...