A Secretaría Xeral comunicou aos representantes da CIG que o proxecto da Consellaría consiste na unificación de centros nun mesmo organismo (os representantes da Administración aludiron especificamente ao modelo do SERGAS). Ese organismo agruparía as Residencias, as Escolas Infantís, os Centros de Discapacitados e Centros Sociais, así como todos os centros do Consorcio. Ficarían fóra os Centros de Menores.

Segundo informou a Consellaría, o persoal pasaría á nova dependencia orgánica mantendo as mesmas condicións laborais das que gozan actualmentei. No entanto, os representantes da Administración aludiron á posibilidade de negociar un convenio propio da nova Axencia Galega de Servizos Sociais. Frente a isto, desde a CIG-Autonómica lles manifestamos que rexeitamos a negociación dun convenio colectivo propio fóra do Convenio Único do persoal laboral Xunta, e que non consentiremos que a Administración leve a cabo esta reorganización a costa do persoal laboral da Xunta.

Canto ás privatizacións que se están a desenvolver na Consellaría, os representantes da Administración afirmaron que a súa intención non é privatizar os servizos sociais, pero recoñeceron que están a realizarse informes sobre o custo dos servizos como, por exemplo, a limpeza (que xa esta externalizada en moitos centros). Nomeadamente, respecto da Residencia "Volta do Castro", a Secretaría Xeral informou de que as prazas sairán a concurso de traslados, e negou que teñan intención de privatizala nestes momentos.

Por último, a secretaria xeral de Benestar comprometeuse a iniciar reunións cos representantes dos traballadores e traballadoras no mes de setembro, para manternos informados e, de ser o caso, marcando un calendario de xuntanzas para desenvolver as negociacións que sexan oportunas.