Dende a CIG-Autonómica vimos reivindicando unha formación de calidade pero tamén en cantidade nos cursos máis demandados polas empregadas e empregados públicos,  o de galego administrativo entre eles. Do mesmo xeito esiximos maior transparencia nos criterios de adxudicación. Se ben eses criterios dos cursos de formación da Xunta viñan sendo obxectivos e o método de inscrición sinxelo e adaptado aos tempos da administración electrónica, os que organiza a Consellaría de Educación a través das Escolas Oficiais de Idiomas baten records.

E baten records en canto ao anticuado sistema de inscrición e de selección: "persoalmente e por rigorosa orde de chegada". A pesar de que todo o peixe soe venderse nas primeiras horas do primeiro día, a convocatoria segue establecendo prazos tan innecesarios coma 20 días naturais. Esta organización tan primitiva provoca situacións coma as acontecidas o 1 de setembro ás portas da EOI de Santiago e que se amosa na imaxe adxunta.  Esta imaxe, ao contrario do que poida parecer, non son alumnos buscando un oco no curso de inglés de 20:00-21:30. Trátase de empregadas e empregadas públicos que buscan unha das 75 prazas nun dos 3 cursos de galego administrativo que a EOI imparte nesta localidade.

Era visto...

A historia comeza ás 23.00h do 31 de agosto cando a primeira candidata acampa no patio cuberto da EOI de Santiago cun saco de durmir. Posteriormente, e ao longo da madrugada, varias persoas foron achegándose e formando unha cola de xente que ás 7.30h superaba ás 100 persoas. Xa cedo, as propias persoas interesadas elaboraron unha lista de orde de chegada para manter a organización na cola. Ás 8.30h o persoal do centro comezou a repartir entre un e dous números por persoa. A partir de aí viñeron os intercambios de palabras, os brazos en alto e algún que outro número polo chan.  As queixas das persoas que estaban na cola ían na liña de que este reparto de números non se axustaba á lista elaborada previamente e a que o reparto de dous números por persoa era inxusto porque non constaba na convocatoria nin se facía noutras escolas. Dende a Escola aseguran que se limitaron a seguir as instrucións que elaborou no 2008 a consellaría para a inscrición nestes cursos.

A responsabilidade: da Consellaría de Educación.

Dende a CIG-Autonómica queremos denunciar actos tan vergoñentos como este ao que nos leva unha desorganización na xestión dos cursos de formación ao que teñen dereito as empregadas e empregados públicos. Esta desorganización ben motivada polo ridículo criterio de asignación das prazas en función do orde de chegada. Xa que logo, instamos á Consellaría de Educación a que empregue neste caso o mesmo sistema que emprega para o resto de cursos das EOIs:  inscrición telemática con designación preferencial do grupo e sorteo aleatorio das prazas.