Novas por contido

Ian Kershaw, o mellor dos biógrafos de Adolf Hitler, danos conta da singular forma de xestionar os asuntos públicos que tiña o xerarca nazi.

Este acostumaba a lles asignar aos seus colaboradores áreas de traballo concorrentes, concatenadas ou que se solapaban, mesmo asignando a mesma área ou as mesmas funcións a dous ou máis dos seus colaboradores. A idea era incitar entre eles a emulación e unha carreira desbocada cara a conseguir os seus obxectivos.

Por suposto, isto foi un sonado fracaso e produciu o colapso de moitas áreas do goberno en vez de producir o efecto contrario, tal e como conta o seu ex-ministro Albert Speer.

Igual que se dun proxecto hitleriano se tratase, a anterior Administración, da man de Suárez Canal, intentou forzar unha estrutura administrativa formada por dous brazos inconexos e con funcións e tarefas solapadas, o SPDCIF e SEAGA. Esta estrutura, herdada, abenzoada e consolidada agora polo goberno do PP, leva, ao igual que levou ao Führer, a resultados catastróficos e ao colapso funcional.

Cun dobre sistema de xestión e de captación de persoal, un a través das listas públicas de contratación e outro a través da propia Empresa para persoal da mesma categoría profesional, a ineficiencia e a falla de coordenación son notables. Unha Administración ben ordenada require unha sistema organizacional no que non cabe a duplicación no exercicio das competencias nin a concorrencia de funcións.

No que respecta aos traballadores, a disfunción deste sistema trae inseguridade xurídica e graves consecuencias como a precarización das condicións de traballo.

Somos conscientes de que moitos dos/as traballadores/as de SEAGA foron forzados/as, a optar polos chamamentos a través desa empresa, por estar paralizadas as listas de contratación do SPDCIF.

Somos tamén conscientes de que este sistema produciu unha merma na valoración dos servizos prestados, tanto a quen traballou en SEAGA como a quen non traballou, por se paralizar a demanda de contratacións a través das listas.

Se as necesidades de contratación estimadas pola Xunta resultan da suma dos chamamentos polos dous sistemas de listas, a única opción clara é valorar os servizos prestados en SEAGA nas listas de contratación unha vez disolvida a empresa e que todos os chamamentos se fagan a través das listas oficiais de contratación. Disto se deriva que non ten sentido pedir a continuidade desa empresa nin a contratación a través das súas listas.

Por iso, desde a CIG-Autonómica, consideramos que debe existir un ÚNICO Servizo Público, o SPDCIF, que debe ser potenciado mediante a disolución de SEAGA e a integración dos seus medios e do seu patrimonio na Xunta de Galiza para os asignar posteriormente a este servizo.


Apostamos por un servizo público profesionalizado, integral, único, con traballadores/as cualificados/as e formados/as, estabilidade laboral, seguridade no traballo e enraizado na sociedade rural. E consideramos tamén que se debe potenciar a prevención sobre a extinción redimensionando o Servizo en base ás necesidades reais, tal e como se demostrou neste ano co déficit de brigadas e persoal, incrementando o número de efectivos e reanudando as tarefas de prevención, interrompidas e subcontratadas a empresas privadas, por parte do SPDCIF.


Apelamos á conciencia de clase e á unidade dos traballadores/as para poder facer fronte ás políticas que promocionan a fuxida do Público, a precariedade no traballo, a división no seo dos traballadores/as, o desmantelamento da Administración Pública e o incremento da Administración Paralela.


Só nunha loita conxunta de todos os implicados directa ou indirectamente, traballadores/as do Servizo, de SEAGA, traballadores/as das listas que están no paro, Axentes facultativos mediombientais, Axentes forestais, técnicos, só entre todos poderemos cambiar a política do PP no noso Sector.


Por todo isto, non consideramos correcto que se convoquen mobilizacións paralelas cando se trata de buscar a unidade de acción e a unidade de todos/as os/as traballadores/as en defensa dos Servizos Públicos.


A CIG-Autonómica fai un chamamento aos comités de empresa de SEAGA para que DESCONVOQUEN a mobilización prevista para o día 7 e se sumen á manifestación unitaria en defensa dun Servizo Público.



Compostela, 5 de outubro de 2010

Outras novas recentes

Xoves, 23 Outubro 2025

Resumo da Comisión de Seguridade e Saúde Laboral da Consellaría do Mar

Na xuntanza da Comisión de Seguridade e Saúde laboral da Consellaría do Mar, celebrada o pasado 16 de outubro tratouse a problemática do radón, os resultados das avaliacións de risco (AR) de varios servizos, a necesidade de formación en condución segura así como aspectos relacionados coa roupa de traballo. Medicións de Radón. Das medicións levadas a cabo nos centros da...
Luns, 27 Outubro 2025

Bases do concurso de educacion infantil + aux. coidador/a (borrador 27/10/25)

A Dirección Xeral de Emprego Público e Administración de Persoal achéganos as bases e o listado de prazas do concurso de traslados das especialidades de educador/a infantil (técnicos/as facultativos e axentes técnicos/as facultativos) e da excala de auxiliar de coidadores. Os sindicatos temos prazo para presentar alegacións ata o luns 3 de novembro, así que se tes algo que...
Luns, 27 Outubro 2025

Sentenza histórica! O Supremo obriga a incluír nas pagas extras as gardas, nocturnidade, domingos e festivos

A CIG-Autonómica esiximos á Xunta de Galiza que aplique de oficio a sentenza do Tribunal Supremo nº 820/2025, do 25 de xuño, e que retribúa de forma completa e con carácter retroactivo os complementos salariais polas gardas, quendas, nocturnidade, domingos e festivos. O Tribunal Supremo vén de establecer que cando as gardas, nocturnidade, domingos e festivos ou...