O policía que o acusa de agresión incorreu en contradicións durante a súa comparecencia e a testemuña da acusación afirma que non viu a suposta agresión
Máis dun cento de persoas amosaron a súa solidariedade co compañeiro detido en Ourense durante o folga xeral do pasado 29 de setembro na concentración de apoio convocada pola CIG este luns 18, coincidindo co xuízo a Jesús Dorado Noya. A protesta tivo lugar diante dos xulgados de Ourense xusto antes do comezo dunha sesión que quedou vista para sentenza.
OS cargos da CIG que estiveron presentes na concentración expresaron o seu firme convencemento da inocencia do compañeiro e a súa confianza en que "a acción da Xustiza aclarará que os feitos que lle imputan son absolutamente falsos e consideramos que esta detención foi totalmente arbitraria e unha mostra de persecución sindical á que tantas veces se ten sometido a nosa central sindical".
Jesús Dorado Noya manifestou diante da xuíza que en ningún momento agrediu ao policía que acusa e lamentou o uso innecesario da forza por parte dos axentes. Lembrou que recibiu un golpe cunha porra durante a carga policial contra o piquete informativo que se atopaba nunha sucursal bancaria da cidade. As testemuñas -compañeiros da central, de traballo e doutros sindicatos- corroboraron a súa declaración e mantiveron que en ningún momento viron a Dorado Noya propinarlle tres puñadas ao policía, tal e como figura na denuncia. No que todos coincidiron foi no desproporcionado da actuación policial e en que o agredido foi o propio denunciado.
Incluso a testemuña da acusación, outro policía compañeiro do denunciante, manifestou non ter visto a agresión da que se lle acusa ao noso compañeiro.
O avogado da defensa tamén incidiu no innecesario da carga policial e lembrou que o informe forense contradí o exposto polo axente no que respecta ás lesións que tería sufrido. O xuízo quedou visto para sentenza.
