Desde a CIG-Autonómica, temos coñecemento de que persoal do centro de ensino CEIP "Juan de Lángara" de Ferrol presentou o 02/06/2011 unha solicitude á Xefatura Territorial da Coruña da C. de Educación para xuntar a Comisión de Horarios estabelecida no Acordo sobre horarios de persoal subalterno de centros de ensino (Resolución da Secretaría Xeral de Educación do 29/01/2009 publicada no DOG de 06/02/2009).
Unha vez transcorridos case tres meses e a punto de comezar un novo curso, a Xefatura Territorial de Educación da Coruña nin convocou a Comisión de Horarios nin solucionou o problema, e segundo nos comunican desde a Xunta de Persoal do Funcionariado dos Servizos Periféricos da Coruña, a Xefatura Territorial non ten intención de resolver este asunto.
Desde a CIG-Autonómica, demandamos á Consellería de Educación que se xunte a Comisión de Horarios coa maior brevidade, tendo en conta, alén do prexuízo para o persoal afectado, o trastorno que podería supoñer para o centro o mantemento dun horario manifestamente irregular.
