O programa non tan oculto: o PP non convocará ofertas de emprego público durante toda a lexislatura
Convencidos da súa próxima vitoria, a poucos días das eleccións xerais, os dirixentes do Partido Popular abandonan o calculado recato co que adoitan expor o seu programa.
Jorge Fernández, vicepresidente 3º do Congreso e candidato por Barcelona, vén de anunciar nun encontro con empresarios que o PP conxelará a oferta de emprego público durante a vindeira lexislatura. Isto significará a non contratación de novos empregados públicos (nin por promoción interna nin por novo ingreso).
Dada a total paralización dos procesos pendentes no ámbito da Xunta, desde a CIG-Autonómica preguntámonos se o Goberno galego está a agardar a que Mariano Rajoy adopte medidas como as anunciadas que afecten as Ofertas de Emprego Público de todas as Administracións do Estado.
Entre os indicios para a preocupación, está a publicación no DOG do 09/11/2011 do Acordo da Comisión Bilateral de Cooperación Administración Xeral do Estado-Comunidade Autónoma de Galicia en relación coa Lei 14/2010, do 27 de decembro, de orzamentos xerais da Comunidade Autonoma de Galicia para o ano 2011, en cuxo punto 1º A) disponse que "a Comunidade Autónoma de Galicia comprométese á súa plena adecuación á correspondente lei de orzamentos xerais do Estado de cada ano, non incluíndo a Lei de orzamentos xerais da Comunidade Autónoma de Galicia para o ano 2012 excepción ningunha á taxa de reposición de efectivos da oferta de emprego público non recollida na correspondente Lei de orzamentos xerais do Estado."
Texto íntegro da nova en Europa Press:
Ante unha nutrida representación de empresarios cataláns e dirixentes do PP, Fernández desgranou algunhas das principais medidas económicas que o seu partido impulsará se goberna, entre as que ha situou a conxelación da oferta pública durante a próxima lexislatura, é dicir, a non contratación de novos funcionarios.