A Comisión de Persoal do 13 de decembro aprobou as propostas de modificación das relacións de postos de traballo (RPT) do Instituto Galego de Estatística, da consellaría de Sanidade-Sergas e da consellaría do Mar, presentadas pola Administración, co voto en contra da CIG. É significativo que ningunha desas modificacións contou co apoio de ningunha das organizacións sindicais presentes.

A modificación da RPT da consellaría de Traballo e Benestar, referente a cambios nas escolas infantís adiase para votala xunto cunha corrección de erros da RPT da consellaría para o vindeiro venres. Descarga a documentación da corrección de erros.

Previamente á Comisión de Persoal, na Mesa Xeral de Empregados Públicos do día 7 de decembro sobre as mesmas modificacións de RPTs, a CIG argumentamos o que sería o sentido do noso voto, en contra:

Instituto Galego de Estatística

Estamos en contra da amortización de dous postos base C2, dun total de 5 da unidade.

O posto de técnico facultativo medio, nivel 18, escala estatística que abren a outras administracións:

• Os representantes do IGE quedaron en pasarnos documentación conforme o posto quedou vacante en concursos, como xustificación a abrila a outras administracións. O que nos achegan é un escrito da presidenta do tribunal de selección, explicando que vai quedar un posto vacante, opinando sobre a imposibilidade de utilizar as listas, e que é fundamental cubrilo mediante persoas doutras administracións. Non entendemos que pinta nesto un escrito dun membro dun tribunal de selección.

• Que haxa problemas para utilizar as listas é algo que a propia Administración pode solucionar se quixer.

• Traer xente doutras administracións non vai supoñer ningún aforro.

• Temos "indicios" de que a apertura do posto non se fai por interese xeral, senón para traer a unha determinada persoa do Instituto Nacional de Estatística.

Din que existe un acordo de reciprocidade entre o IGE e o INE. Non nos consta que fósemos escoitados, polo que ao tratarse de materia de persoal, non lle damos validez a ningún acordo deste tipo sen a negociación cos representantes dos traballadores e traballadoras.

RPT de Sanidade-Sergas (agás persoal veterinario)

Na Mesa Xeral do 7 de decembro solitáramos a retirada do punto da orde do día pola falta de negociación previa da consellaría e pola ausencia de información do custo da modificación. Non fixeron nin caso, a directora de Recursos Humanos non se presentou e a representante que enviou  limitouse a dicir obviedades. No que si foi clara é que a RPT é insuficiente, pero como Facenda impide ampliar o gasto en persoal recorren ao persoal estatutario que é máis doado de mover. Solicitamos que constase en acta esa aseveración, que admite a presenza irregular de persoal  nos Servizos Centrais.

Alén disto, o 1 de xaneiro do 2012 (falta menos dun mes) a RPT vai cambiar pola desaparición das Direccións Provinciais do Sergas da Coruña e Ourense, algo no que fixemos fincapé para denunciar o sistema de xestión de persoal desta Consellaría.

Só aceptaron as dúas "consideracións" que fixo no seu informe Función Pública: os subinspectores sanitarios (nivel 22) non poden ser de LD e a experiencia para as seccións de informática pode ser mérito, pero non requisito.

Tiran para diante e seguen na súa liña: facer reunións sen contido para aparentar negociación, non cumprir prazos nin atender reclamacións, facer como que non oen cando denunciamos irregularidades e practicar a política de feitos consumados, que logo pasan por calquera mesa de negociación para formalizala.

RPT de Traballo e Sanidade

• Solicitamos que os postos de TEXIS nas E.I. de Sta. Mª de Orza e do Sagrado Corazón sexan de xornada completa.

• Non estamos de acordo con que se supriman os postos de subalternos nas E.I. de Marín e de Celeiro.

• Posto creado de peón de mantemento na Residencia de Maiores do Ferrol: esixen permiso de condución. Este posto crease para darlle destino ao amortizado na E.I., a quen non se lle pediu permiso de condución no seu día, polo que queremos que se elimine este requisito.

• Solicitamos que o orzamento sobrante sexa investido nas própias escolas infantís.

RPT do Mar

Trátase dunha modificación motivada pola execución dunha sentenza xudicial que obriga a crear unha praza. Co que non estamos de acordo é coa amortización doutra praza vacante que realiza a consellaría para "compensar".