Albert Einstein definiu a tolemia como “repetir o mesmo acto unha e  outra vez esperando resultados diferentes”. Pois ben, a Xunta de Galiza acaba de anunciar a construción dunha incineradora no Irixo para repetir o fracasado modelo que Sogama implantou en Cerceda.

Na planta de Sogama en Cerceda que se trata de replicar no Irixo máis da metade do lixo vai directamente ao vertedoiro e se incinera outro 42% conseguindo soamente unha porcentaxe de reciclaxe do 6,8%.

Ao problema medioambiental evidente que provoca o soterramento de residuos e a incineración dos mesmos hai que engadir os posíbeis problemas de saúde que ocasionan eses métodos. Valga como exemplo o dato de que na planta xemelga se levan soterradas máis de 15.000 toneladas de medicamentos procedentes do SIGRE.

A planta do Irixo tratará unhas 300.000 toneladas de lixo que procederán de fora da provincia (hai fontes que falan que incluso tratarán residuos de fóra de Galiza). Segundo o modelo proposto unhas 150.000 toneladas acumularanse no vertedoiro do Irixo e outras 130.000 incineraranse.

Todo isto soamente se agravará no futuro xa que a propia Xunta de Galiza prevé pasar das 900.000 toneladas de lixo que se xeran agora no país a uns 2.000.000 de toneladas no ano 2017 segundo se recolle no Plano de Xestión de Residuos Sólidos Urbanos (RSU) de Galicia.

Todo este despropósito vai custar 230 millóns de euros e a planta foi adxudicada a dedo a unha empresa que acadou, recentemente, unha adxudicación eólica de 186 Megavatios. O seu nome: Estela Eólica, unha empresa creada no mes de agosto do ano 2007.

A cidadanía debe coñecer que hai alternativas a este tipo de plantas como a que existe na Mancomunidade do Barbanza que consegue recuperar e reciclar o 69% dos residuos que recibe grazas a técnicas de reciclaxe e compostaxe. Moito menos invasivo, con menos impacto medioambiental e con menores riscos para a saúde.

Para que nos traguemos este sapo o Partido Popular esgrime o estandarte do emprego que vai crear a incineradora e fala de 250 postos de traballo que creará a planta do Irixo. A demagoxia e a falla de escrúpulos ao utilizar o populismo barato nun contexto no que máis do 20% da poboación do estado está no paro soamente é equiparábel á manipulación dos datos e á ocultación á cidadanía de que outras alternativas xerarían moitos máis postos de traballo.
Explicámonos: Se a planta do Irixo vai ter 250 postos de traballo e baseándonos no ratio de traballadores nas cadeas de reciclaxe que ten Sogama en Cerceda (2/5 partes aproximadamente) podemos calcular que haberá unhas 100 persoas traballando na cadea de reciclaxe. Visto que unha planta deste tipo samente recicla o 6,8% do que recibe. Imaxinemos o emprego que se crearía si se incrementara a porcentaxe de reciclaxe a cifras significativas.
Fagamos o cálculo. Si se reciclara tan so o 50% do que recibe a planta serían precisas 700 persoas na cadea de reciclaxe co cal o volume de postos xenerados pasaría dos 250 que din que vai crear esa planta a 850 novos postos de traballo. Se reciclara o 68% do que recibe crearíanse
1150 postos de traballo. Máis limpo, máis seguro e con máis emprego. Por qué non é este o modelo que defende o Partido Popular?

Esta é unha nova demostración da discriminación que sofre a provincia de Ourense por parte da Xunta de Galicia. O que ningúen quere por ser destructivo para o medio ambiente e por afectar a saúde das persoas  implantase  na zona máis marxinada da Galiza que sofrira graves consecuencias económicas e de saúde no futuro.