Dende as 14.15 do 27 de febreiro houbo en San Caetano unha asemblea permanente na que comezaron máis de medio centenar de persoas que debateron os documentos que acompañan ao proxecto de lei que foron facilitados polos grupos da oposición; o PP negouse a facilitárnolos, primeiro desde o goberno e despois no Parlamento. Examinando a baixa calidade e o paupérrimo contido destes, entendemos porque non querían facelos públicos.
Os ditos documentos foron: a “memoria” económica, o informe sobre impacto de xénero e o informe da asesoría xurídica. Destes, o que chamou máis a atención da asemblea pola falta de rigor foi o primeiro; palabras ou frases como “estímase”, “dedúcese”, “non hai datos”, “presúmese”, etc. inzaban o texto.
Posteriormente, a asemblea decidiu constituír un grupo de traballo para desmontar este desastre de memoria económica. A inspiración puxérona elementos coma os cartaces de "1988 FEIJOO TAMÉN ESTABA PECHADO" e "NON AO PROXECTO DE LEI FEITO A MEDIDA PARA ACABAR CO EMPREGO PÚBLICO", as exquisitas viandas que achegaron desinteresadamente algúns compañeiros e compañeiras e sobre todo o bo ambiente que foi "in crecendo" entre as persoas que fixemos noite no edificio administrativo (ver foto)