Na asemblea organizada pola CIG en San Caetano o 24 de maio, bautizouse o actual anteproxecto de Lei do emprego público de Galiza como a "alfombra vermella para a corrupción" na Xunta de Galiza.
Esta asemblea chegaba pouco despois de que a Administración puxera enriba da Mesa Xeral exactamente o mesmo texto que antes de remitirlle as alegacións. Despois da exposición por parte de varios compañeiros e compañeiras dos puntos máis destacados do novo texto, a asemblea por unanimidade concluíu sobre a gravidade do texto e o cambio que vai supoñer no modelo de Administración. Non se trata dun cambio cara a modernidade, senón dunha volta ao pasado, a unha Administración politizada con persoal directivo alleo e unhas traballadoras e traballadores públicos completamente controlados sen que se lle garanta a súa profesionalidade e independencia.
Precisamente destacouse a importancia da figura do traballador público actual como garante da necesaria transparencia e cumprimento escrupuloso da legalidade que demanda a cidadanía. Somos as traballadoras e traballadores públicos os que facemos que a Administración sexa unha ferramenta da cidadanía e non ao servizo do partido político no poder. Se cuestións como a mobilidade, a carreira administrativa, as retribucións e mesmo a remoción do posto, dependen en exclusiva dun informe dun superior elixido politicamente, vaise constrinxir de xeito serio a capacidade de denuncia das irregularidades por parte das traballadoras e traballadores públicos por unha simple cuestión de medo.
Tras aclarar algúns aspectos concretos e logo dun debate aberto e participativo, sacáronse as seguintes conclusións para impulsar nos ámbitos que correspondan:
- Elaborar un calendario de mobilizacións paralelo ao proceso negociador que propón a Administración e que sexa aberto ao resto de OOSS en aras da procura da unidade sindical.
- Organizar un referendum interno, dirixido en principio a todo o noso colectivo, con respecto aos principais puntos desta lei (Persoal directivo, Avaliación do rendemento e carreira administrativa, concursos e mobilidade), similar ao que se levou en Madrid no ámbito da Sanidade Pública.
- Facer unha campaña informativa cara á cidadanía do significa esta lei, con mesas abertas á sociedade.
- Como horizonte final desta campaña, valorar a convocatoria dunha folga xeral indefinida, se algo queremos algo temos que sacrificar.
