A Administración volve a insistir cun modelo de carreira que non cumpre as mínimas expectativas nin da CIG nin das persoas empregadas públicas. De todos os problemas, eivas, discriminacións e desigualdade que leva consigo este modelo, e que levamos anos denunciando, non corrixen nin un.

Tráennos, ademais, un texto que foi negociado fóra das mesas e sen a presenza da CIG polas outras organizacións sindicais e isto é o produto desa submisión:

1. Seguen a teimar en que exista prazo para as solicitudes no canto da nosa proposta de que o recoñecemento dos graos debe producirse no momento en que a persoa empregada pública reúna os requisitos. Non admiten que sexa un sistema aberto análogo ao dos trienios ou ao dos sexenios do profesorado. O sistema de prazos implica que aínda que unha persoa cumpra os requisitos non vai poder acceder á carreira ata que a Xunta abra o prazo, e isto pode prolongar a perda do dereito en ata 3 anos. O prazo para solicitala vaise prolongar ata mediados de decembro de 2025 e terá efectos retroactivos dende o 01/01/2025.

2. Seguen esixindo estar en activo nunha data: o obxecto disto é excluír ao persoal que non estaba traballando nesa data exacta, neste caso no 31/12/2024. Si atenden á nosa alegación anterior deixaría de ter sentido.

3. Non permiten acceder a todos os graos da carreira. No SERGAS o persoal xa cobra o grao IV. Este sistema debe DAR ACCESO A TODOS OS GRAOS de xeito simultáneo e non consecutivo.

Calquera persoa que cumpra os requisitos para acceder a máis dun grao, debe poder acceder a eles simultaneamente, para iso estamos a falar dun sistema extraordinario. Seguen a penalizar ao persoal con máis antigüidade moito do cal non vai poder acceder ao grao IV antes da xubilación.

Ao mesmo tempo perden a oportunidade de paliar o castigo que a Xunta, CCOO e UGT impuxeron ao persoal interino, xa que de admitir o acceso a todos os graos recuperarían en parte os graos perdidos.

4. Fenda salarial. Manteñen a referencia aos importes previstos nos acordos anteriores de xeito que o subgrupo superior cobrará máis do triplo do subgrupo inferior, agrupación profesional. Defendemos un incremento dos importes inferiores para minorar a fenda retributiva.

A Lei 30/1984 establece que o soldo dos funcionarios do grupo A non poida exceder en máis de tres veces o soldo dos funcionarios do grupo E. Se ben é certo que isto fai referencia ao soldo, a filosofía e o espírito da norma parecen claros ao establecer unhas limitacións para NON INCREMENTAR A FENDA SALARIAL entre grupos.

5. Non admiten o reinicio da carreira nun novo subgrupo coas contías do mesmo. Ao acceder a un novo subgrupo por promoción interna a contía dos graos anteriores debería corresponderse coa do novo subgrupo. O importe de todos os graos debería percibirse na contía do subgrupo onde se prestan servizos, pero a administración non o quere admitir.

6. Seguen liándoa co cómputo da antigüidade: para o cómputo da antigüidade deberían ter en conta os certificados de servizos prestados a efectos de trienios e non outros criterios. No o admiten e iso vai dar lugar a que a moitas persoas lles computen un tempo menor.

7. Formación. Non podemos aceptar requisitos de horas de formación mentres non se dea acceso á mesma a todo o persoal que o solicite e mentres non se recolla a nosa demanda de non existir prazo aberto para as solicitudes. A EGAP debería habilitar de urxencia formación suficiente para que quen queira acceder a ela poida facelo.

8. Manteñen a chantaxe da funcionarización. A Xunta segue mantendo a privación do dereito á carreira como sanción ante a negativa á funcionarización do persoal laboral fixo. Que se lles restitúa a carreira no grao que corresponda, se permita acceder aos novos graos e se lles abonen os atrasos derivados da suspensión.

9. Reducen pero manteñen os tramos dos efectos económicos. Fraccionar a carreira, aínda que o reduzan de 4 a 3 anos significa adiar aínda máis o acceso pleno. Con isto só se cobrará o 33% do importe no 2025, o 66% no 2026 e só o 100% no 2027. Esiximos que non existan tramos, e a carreira se faga efectiva na súa totalidade co 100%.

10. Seguen mantendo exclusións. Non se nos escapa que o obxectivo da Administración e excluír ao máximo persoal posible da carreira. Continúan excluíndo a unha parte importante do persoal dalgúns entes. Solicitamos que lles apliquen a carreira subsidiariamente, que deberá pagar o ente, mentres non teñan unha propia.

11. Non admiten que haxa un grao máis. Mentres noutras administracións xa hai un grao V, nesta restrínxese tal posibilidade, o que vai implicar que haxa persoas que queden no grao IV durante decenios ata a xubilación.

Estamos ante unha oportunidade perdida para darlle a volta a un sistema de carreira que non cumpre as expectativas da maior parte das persoas empregadas públicas. De aquí á Comisión de Persoal, que non é mesa de negociación, solicitamos que a Xunta atenda as demandas do persoal, cun novo modelo de carreira extraordinaria máis equilibrado e áxil.