Novas por contido

Os Tribunais de Xustiza veñen de estimar a demanda presentada a través dos servizos xurídicos da CIG por un funcionario, sobre a cobertura en comisión de servizos do posto de director da Oficina de Emprego das Pontes (Xefatura Territorial de Traballo e Benestar da Coruña).

O posto de director desta oficina de emprego (nivel 20), fóralle concedido en comisión de servizos a unha persoa funcionaria do subgrupo C2 destinada noutra consellería e sen experiencia en oficinas de emprego, apesar de que fora solicitado tamén por un traballador do subgrupo C1 destinado na Oficina de Emprego das Pontes desde hai anos.

O Xulgado do Contencioso nº 1 de Ferrol sinala que a Resolución de 27 de marzo de 2006, pola que se ditan instrucións sobre a cobertura temporal de postos de traballo mediante comisión de servizos, contempla que para as comisións de servizo debe propoñerse, preferentemente, a persoas do mesmo centro directivo.

Esta preferencia do persoal do mesmo centro foi incumprida neste caso sen que a Administración o motivase. Por iso, a sentenza estima a demanda interposta polo funcionario que, ao executarse a sentenza, actualmente xa se encontra desempeñando o posto de director da Oficina de Emprego das Pontes.

Cómpre ter en conta, ademais, que é responsabilidade da Dirección Xeral da Función Pública asegurar o cumprimento da normativa en materia de comisións de servizo. Casos como o da Oficina de Emprego das Pontes exemplifican que se está a facer uso da figura da comisión de servizos para fins espurios, limitándose a Consellería de Facenda a amparar a ilegalidade, dándolle o visto e prace ás persoas propostas polas Consellerías para cubrir os postos en comisión, ignorando a preferencia do persoal da unidade e calquera criterio obxectivo de idoneidade.

Desde a CIG valoramos positivamente a rápida actuación da Xustiza neste proceso xudicial, levado exitosamente polos servizos xurídicos do noso sindicato, que vén a confirmar ademais que existen límites á discrecionalidade nas comisións de servizo, sentenzando que a Administración ten a obriga de motivar os supostos nos que se adxudica unha comisión de servizo a persoas alleas á unidade.

Descargar a sentenza 73/2013 do Xul. do Contencioso-Admvo. nº 1 de Ferrol

Outras novas recentes

Mércores, 01 Outubro 2025

Concurso de traslados de enxeñarías, arquitectura e ciencias: apertura do prazo de toma de posesión

No DOG do 01/10/2025 publican a RESOLUCIÓN do 24 de setembro de 2025, da Dirección Xeral de Emprego Público e Administración de Persoal, pola que se modifica a Resolución do 9 de xullo de 2025 pola que se resolve o concurso ordinario para a provisión de postos de traballo vacantes de corpos e escalas de Administración especial da Administración xeral da Comunidade Autónoma...
Mércores, 01 Outubro 2025

RPT de Medio Rural e RPT da administración especial para poder finalizar o concurso de enxeñarías, arquitecturas e ciencias

O venres 26/09/2025 celebrouse a Comisión de Persoal onde se levaban dous asuntos,   RPT de Medio Rural Estamos en contra dunha modificación de RPT na que se amortizan 14 postos de traballo para crear 7. Sen os postos derivados do decreto de estrutura temos que se destrúen 7 postos para crear 2 e para financiar a inmoral e insolidaria suba do complemento específico dos...
Venres, 03 Outubro 2025

Persoal da Xunta de Galiza reclama unha solución inmediata á parálise dos concursos de traslados (Concentración 30/09/2025)

A CIG demanda unha prelación xusta, axilidade na resolución, máis medios e a duplicidade dos postos bloqueados por medidas xudiciais Traballadoras e traballadores da Xunta de Galiza concentráronse na mañá do martes 30 de setembro de 2025 diante do edificio administrativo de San Caetano para esixir unha solución inmediata aos concursos de traslados, paralizados dende hai...