Novas por contido

Á Mesa Xeral celebrada o mércores 16 de outubro levouse a creación de varias escalas de persoal funcionario para o proceso de funcionarización de categorías de persoal laboral. O director xeral de Función Pública comenta que con esta modificación proposta da Lei de emprego público de Galiza (LEPG) está case listo o asunto da creación de escalas para a funcionarización.

Dende a CIG facemos constar o noso malestar pola burla que supón traer esta materia despois de negociala previamente na comisión de seguimento do Acordo de mellora. Tal e como se pode apreciar nos resumos das xuntanzas desa comisión de “seguimento” que fan públicos as organizacións asinantes, nese foro se negociou a modificación da LEPG para crear escalas, a RPT do Consorcio, e materias que son alleas ao acordo. Sobardar as materias do acordo e negociar asuntos propios da mesa xeral é ir contra a boa fe negocial e nos reservamos acudir á vía xudicial para garantir os nosos dereitos como sindicato maioritario.

A maiores tamén parece unha burla que o mesmo día desta mesa xeral se envíe un novo borrador con dúas horas de antelación onde se modifican diversos puntos do borrador sobre o que imos negociar. 

Parece meridianamente claro que CCOO e UGT pactaron o borrador inicial sobre a creación de escalas e as funcións das mesmas e agora no novo borador se limitan a aceptar algunhas das nosas alegacións.

Con carácter xeral observamos que o que se pretende ao establecer as funcións das novas escalas é unha cousa para nós moi grave:

  1. Atribuir funcións de superior categoría ás novas escalas, co cal coa funcionarización o persoal vai ter que realizar esas funcións sen poder demandar no xulgado a superior categoría nin o incremento salarial debido.
  2. Substraer a negociación das funcións que era do ámbito propio do Convenio Colectivo onde había que PACTALAS coa parte social, a un ámbito onde se establecen por lei sen a posibilidade de negociar a atribución de funcións.

Este é un dos perigos dun proceso de funcionarización do persoal laboral mal feito por culpa do Acordo de CCOO e UGT coa Xunta: se establecen as funcións por lei e non por acordo e ademais asignan funcións de superior categoría a moitas das novas escalas.

Como exemplo baste as funcións que se lle atribúen ao persoal de limpeza e cociña, ou de recursos naturais como a aplicación de tratamentos fitosanitarios, manexo de embarcacións, etc, propias de categorías superiores ás que se poidan encadrar nunha Agrupación Profesional onde non se pide máis que o certificado de escolaridade.

No texto enviado 2 horas antes asumen parte das nosas alegacións:

  • Na Agrupación Profesional, escala de persoal de limpeza e recursos naturais e forestais, especialidade de persoal de recursos naturais e forestais, elimináronse as funcións relativas ao manexo de maquinaria (tractores) ou embarcacións.
  • Respecto á escala de restauración do A2 modificáronse as funcións quedando claro que realizan funcións de apoio (polo tanto fan funcións de apoio ao A1), e eliminouse a esixencia de licenciatura como requisito de titulación.
  • Na escala técnica de condución, modificouse a titulación, de xeito, que a titulación esixida pasa a ser a de bacharelato ou equivalente e non a titulación de técnico. Así mesmo se modificaron as funcións da escala técnica e da escala auxiliar.
  • Na escala técnica de análise de laboratorio engádense como titulacións as ramas de química e marítimo-pesqueira.
  • Na escala técnica de recursos naturais elimínanse as funcións de dirección.
  • Modifícanse as funcións do bombeiro forestal xefe de brigada como consecuencia da creación dunha escala de bombeiros forestais no C1, denominada “bombeiro forestal encargado de brigada”.
  • Na escala de orientación laboral do A2, se modifica a denominación da escala quedando así: “escala técnica de orientación laboral” (se elimina a palabra “aberta”).

CIG considera parte destes cambios positivos pero insuficientes e que non abordan a totalidade do demandado para esas escalas nin para o resto onde non se asumiron as nosas alegacións. No caso das funcións, as alegacións feitas abranguen case a totalidade das escalas que pretenden crear e como se ve só aceptaron mudar algunhas en 4 das novas escalas. Ademais débese manter a denominación de Corpo Subalterno, dentro da agrupación profesional de persoal funcionario non debendo crearse como escala.

Sen prexuizo das escalas que se crean, debense crear escalas de:

  • Mantemento de Servizos.
  • Recursos Naturais e Forestais.
  • Cociña.

dentro do grupo B ao ser esixida para o acceso ás categorías equivalentes de persoal laboral un título equivalente ao de técnico superior, e así poder establecer un itinerario profesional para determinadas escalas tal e como se fai coas escalas de arquivos, bibliotecas e museos, no que si aceptan a histórica alegación da CIG de crear unha escala intermedia no subgrupo C1.

Demandamos a creación no subgrupo C1 da escala de coidadoras que se corresponda coa actual categoría III-99.

Ao substraer esta creación de escalas e funcións do ámbito da negociación laboral e optar pola imposición sospeitamos que os problemas serán crecentes.

A maiores pedimos que se engada unha disposición transitoria no que conste que a primeira OEP dos grupos e categorías de persoal laboral a funiconarizar realizarase a través dun proceso selectivo de persoal laboral, tal e como marca o V Convenio, cun 50% de prazas para a promoción interna e posteriormente, e antes de ningún proceso de funcionarización, farase un concurso de traslados para todo o persoal laboral da Xunta de Galiza.

Outras novas recentes

Venres, 22 Marzo 2024

Prazas para elección de destino Agrupación profesional-Subalterno (22/03/24)

A Dirección Xeral de Función Pública achega un listado de prazas que ofertará para a elección de destino do proceso selectivo da agrupación profesional - subalterno. A localidade dos postos pode verse no código que vai nas posicións 11 a 15 do código (XX.XXX.XX.XXX.XXXXX.XXX) No mesmo arquivo que poñemos a túa disposición para descargar, vai tamén a RPT íntegra con todos os...
Mércores, 20 Marzo 2024

Prazas para elección de destino Minas-Bibliotecas-Arqueologos-Museos-Obras Publicas-Arquivos (19/03/24)

A Dirección Xeral de Función Pública achega os listados de prazas que ofertará para a elección de destino dos seguintes procesos selectivos: A1 Minas A1 Bibliotecas A2 Bibliotecas A1 Arqueólogos A1 Museos A2 Museos A2 Obras Públicas A2 Arquivos Neste lote botamos en falta A1 de Arquivos.
Mércores, 20 Marzo 2024

Procedemento de acreditación dos méritos do concurso-oposición de estabilización dos subgrupos A1, A2, C1 e C2 e grupos I, III e IV

No DOG do 20/03/2024 publican: - RESOLUCIÓN do 13 de marzo de 2024, da Dirección Xeral da Función Pública, pola que se fai público o procedemento para a acreditación dos méritos de determinados procesos selectivos extraordinarios de estabilización derivados da Lei 20/2021, do 28 de decembro, para o ingreso, pola quenda de acceso libre e mediante o sistema de...