Delegados e delegadas da CIG concentráronse o martes 17 de decembro diante do Parlamento de Galiza, coincidindo co debate dos orzamentos para o ano 2020, para manifestar o seu rexeitamento a unhas contas que non contemplan nin a recuperación dos dereitos que en material salarial, laboral e social lles foron roubados, nin a recuperación dos servizos públicos que están sendo desmantelados por mor dos recortes impostos na última década.

Son uns orzamentos continuistas que veñen afondar nos recortes, tanto salariais, porque non se procede a recuperar salarios, nin complementos, como en material de persoal, porque non se elimina a taxa de reposición, nin se frea o proceso de desmantelamento que están sufrindo os servizos públicos.

Fronte ao mantemento dos recortes o que demandamos é que se aprobe un Plan para negociar a débeda salarial contraída pola Xunta de Galiza cos recortes salariais, especialmente coas cantidades adebedadas polos recortes no complemento específico ou equivalente en anos atrás. Non abonda con  restituír o complemento específico da extra senón que hai que devolver o roubado.

Ademais esiximos que se cree un complemento para restituír os soldos base e trienios da extra até o importe completo das mensualidades ordinarias. Isto xunto coa derrogación da lei 1/2012 de medidas na súa integridade, moi especialmente a suspensión do artigo 19 do V Convenio. Con todo, ao derrogar esa lei levántase a suspensión do Plus dos Altos Cargos, polo que a súa derrogación debería implicar a derrogación expresa e definitiva dese privilexio cuxos importes demandamos que se destinen ao fondo de continxencia.

Canda isto demandamos o establecemento da xornada de 35 horas, con carácter xeral, para todos e todas as empregadas públicas da Xunta de Galiza e os seus entes e que se estenda a carreira profesional a aqueles que o Acordo de concertación quixo excluír, cos mesmos dereitos dende o 1 de xaneiro de 2019, especialmente a quen non optaron pola chantaxe da funcionarización, ao persoal interino e temporal e tamén ao persoal fixo e temporal dos entes, especialmente polo seu número ao do Consorcio de Igualdade e Benestar.

De igual modo defendemos que se establezan novos tramos reducidos para consolidar os graos I e II para os subgrupos A1 e A2 e I e II de laborais iguais ao do resto dos subgrupos, considerando que iso tamén é discriminatorio, así como a recuperación do Fondo de Acción Social.

A CIG denuncia que este anteproxecto e o Acordo de Madrid seguen consolidando o recorte de emprego público ao manter a taxa de reposición. Consideramos que se debe establecer a non existencia de taxa de reposición co fin de rematar coas graves carencias de persoal da Xunta de Galiza.

Neste sentido sinalamos que non se debe estabelecer ningunha limitación, tal e como aparece no texto, nin nas causas nin nos ámbitos á hora de poder realizar contratacións de persoal temporal e interino sexa para postos vacantes, como para substitucións transitorias.