Ante a falta de información oficial da situación real nos centros de Política Social, a CIG entregou á Fiscalía Superior de Galiza, por segunda vez, datos actualizados elaborados coa información recollida polos nosos delegados/as e persoal dos centros. Podes descargala aquí.

A pesar de que llo vimos requirindo dende o comezo desta crise, a consellería de Política Social négase a dar datos de persoas usuarias infectadas, persoas falecidas por causa do virus e incluso non informa das  traballadoras e traballadores que deron positivo nos seus centros. 

Este escurantismo non permite avaliar a dimensión real das persoas contaxiadas polo virus nin a efectividade das medidas de prevención implementadas.

Destacar tamén a falta de información acerca das chamadas “residencias integradas”, é dicir, as residencias de xestión pública onde envían a residentes positivos ou negativos derivados de residencias privadas nas que saltou a alarma. Como a Residencia de Tempo Libre de Panxón (de negativos) ou Porta de Camiño e Baños de Molgas, e agora parece que hai algunha mais como Nuestra Señora de Fátima en O Barco, etc. Isto unicamente sabémolo polas comunicacións directas de persoas que prestan servizo nos centros xa que a CIG, como organización mais representativa neste ámbito, non ten información por parte da consellería.

Sabemos polo persoal empregado público que os están a trasladar a residencias privadas, con declaración de intervención, integración ou sen ela, nunha estraña sorte de cesión de persoal onde só existen obrigas laborais e poucos dereitos e nin se garante nin un triste EPI axeitado, e moito menos formación preventiva ante o contaxio do COVID 19. Compre  que nas residencias privadas das que estamos a falar teñen un alto numero de contaxios entre persoas usuarias e traballadoras, e as medidas preventivas fronte o COVID19 non existen.

Cando remate todo isto teremos que facer as contas sociais e económicas do que supón este sistema de xestión privada dos servizos sociais para o pobo galego.

Diante da apertura de dilixencias por parte da Fiscalía de Galiza sobre a xestión nas residencias de terceira idade durante a presente situación de emerxencia sanitaria presentámoslle un segundo informe que actualiza o anterior do día 26 de marzo. Nel introducimos a situación a nivel de prevención de riscos laborais dos centros sociais-residenciais, entre os que están as residencias de maiores, de menores e os centros de atención á discapacidade dependentes da Consellería de Política Social, xunto cos datos de contaxios e realización de test aportados polo persoal.

Ambos datos, de vital importancia, porque na CIG entendemos que é a única forma de actuar consecuentemente contra a expansión do virus e coñecer a presencia real do coronavirus. 

Así tamén volvemos a ofrecer a posta ao dispor de toda a documentación, denuncias e outra información que fixemos en relación ás residencias da Xunta dende o comezo da alarma sanitaria polo COVID 19.