Nestes días estamos a recibir multitude de queixas porque non se están a proporcionar máscaras ao persoal da Xunta, especialmente nos centros administrativos e nos de educación. Para saber que máscara é a que tes que poñer (cirúrxica ou Fpp2) consulta a Avaliación de riscos laborais ao risco biolóxico Covid do teu centro no posto ou tarefas que realices.
En xullo publicamos unha nova no noso web explicando a normativa actual que obriga ao empresario/a de proporcionar máscaras e outro material de protección, e propón aplicar sancións se non cumpre.
Como exemplo, logo da denuncia da CIG-Autonómica ante a Inspección de Traballo e Seguridade Social pola falla de medidas nas escolas infantís, a autoridade laboral requiriu á revisión dos protocolos en relación co uso da proteción respiratoria instando á Xunta á proporcionar 1 máscara cirúrxica cada 4 horas e sinala o uso de EPI (máscara FPP2) naqueles supostos de persoal especialmente vulnerable e/ou nas tarefas con risco (salpicaduras, etc..) nas que é imposible gardar a distancia de seguridade.
Como conclusión:
- A máscara é obrigatoria no posto de traballo cando non hai distancia de seguridade e ten que proporcionarcha a empresa.
- Deben proporcionarche 1 cada cada 4 horas (cirúrxica) ou aquelas que polas características do posto e, segundo a Avaliación de riscos laborais, che correspondan.
- O incumprimento polo empregador/a das obrigacións constituirá infracción grave.
- Calquera persoa pode acudir a denunciar na Inspección de Traballo e Seguridade Social se non lle dan a máscara de protección axeitada.
Se non che están a facilitar as máscaras, escríbenos a xunta@cigadmon.gal (ou emprega o formulario de contacto) indicando o teu nome e apelidos, teléfone, posto e centro de traballo, e poremos unha denuncia na Inspección de Traballo. Se o prefires podes facelo ti directamente.
Para mais información: web da CIG saude laboral
