Chegounos á CIG información de que na redacción dos novos pregos de contratación da conservación de estradas feitos pola AXI se está a incluír que as empresas privadas fagan as funcións de vixilancia de explotación (informes, denuncias, vixilancia do dominio público, etc), que deben estar reservadas a persoal funcionario da administración.
Estas funcións están sendo realizadas por persoal propio que ten pendente un proceso de funcionarización e promoción interna, e que leva pendente de resolver dende o 2019. Tamén se conta con previsión de prazas suficientes para poder cubrir por listas ou promoción interna.
O persoal de vixilancia da AXI está indignado por que os procesos selectivos para a escala de axentes de inspección, especialidade de dominio publico hidráulico e especialidade de vixilancia de estradas (subgrupo C1) derivados da OPE 2020, están sen rematar, procesos que segundo os acordos asinados tiñan que ter rematado no 2019 e non foron publicadas as convocatorias ata o 2022 e os exames en xuño do 2023. A entrega de documentación para a fase de baremo foi xa fai meses e ata o 07/05/24 non se publicou o baremo provisional. E isto porque para que publicasen este baremo foi necesario presentar unha queixa ante a Valedora do Pobo da que aínda non temos resposta (pero si publicaron o baremo provisional).
Agardamos que de esta nova Dirección Xeral de Emprego Público que non deixe esquecido outra vez o proceso e se publique a resolución no menor prazo, unha vez que o persoal leva agardando por esta promoción mais de 5 anos e a Xunta non cumpriu os prazos que establecían os acordos. A negociación destes procesos iniciouse no 2016 (hai xa 8 anos).
Lembramos que este persoal de estradas leva realizando funcións que corresponde a un grupo superior dende a sinatura dos acordos (2019) por confiar no compromiso e sinatura da Administración duns prazos que non cumpriu.
Pero aínda hai máis: unha vez rematado o proceso non se van a cubrir as 57 prazas do acordo de estradas quedando mais da metade sen cubrir polo que solicitamos que se inicien os mecanismos para a convocatoria dunha nova OPE con esas prazas. O que pon no Acordo e na Addenda que se asinaron é que as prazas que non se cubran por promoción interna se convocarán por acceso libre.
