A directora xeral de Emprego Público e Administración de Persoal convocounos para falar deste asunto o día 06/08/2025. Antes da resolución do concurso de traslados de enxeñarías, arquitectura e ciencias xa tiveran que retirar dous postos por medidas cautelares de persoas en destino provisional que demandaron o destino definitivo. Pero despois de publicar a resolución do concurso o 11 de xullo, recibiron outros 9 autos de medidas cautelares. 8 deles son por procedementos ordinarios e 1 por extensión de efectos de sentenza. Das 9 medidas cautelares, 8 afectan a postos xa adxudicados ao concurso e que agora se ven obrigados a non adxudicar. A outra medida cautelar non afecta a postos adxudicados no concurso.

Prevén que a primeiros de setembro poidan chegar máis medidas cautelares e xa non poderán cumprir co compromiso de que en xullo/agosto serían as tomas de posesión do concurso e destinos definitivos dos procesos. Non sería ata setembro, sempre e cando poidan garantir a seguridade xurídica do proceso.

Respecto do concurso de traslados:

• As persoas afectadas non serán só as 8 ás que se lles adxudicaron os postos agora retirados por medidas cautelares, senón tamén todas aquelas ás que se lles adxudicou por resultas un dos postos que puideran deixar esas 8 persoas.
  
  
• Non farán unha rebaremación. É dicir, que as persoas que por medidas cautelares queden sen posto, quedarán directamente fora do concurso, sen opción a adxudicárselle outro. Xustifican isto alegando que se rebareman e finalmente a xustiza rexeita no futuro a petición dalgunha das persoas á que lle deron medidas cautelares, hai risco de que a totalidade do concurso quedase anulado. Tal e como fan, os efectos futuros dunha sentenza desestimatoria serían só sobre os postos retirados.
  
  

Respecto das eleccións de destinos:

• Hai postos suficientes. O risco está nos postos abertos a varias escalas e subgrupos, de xeito que se hai moita xente de A1 que colle postos A1/A2, hai riscos de que non cheguen de A2. O mesmo ocorre con postos abertos a varias especialidades. Por esa razón, e segundo o caso, poderían convocar elección de destino gradualmente ou por lotes de especialidades.
  
  
• Chegado o momento, se teñen problemas, farían unha modificación urxente da RPT para adaptar postos.
  
  
• Non especifican se utilizarían ou non postos vacantes que non pasaron polo concurso. A solución que darán queda aberta segundo as necesidades que teñan.
  
  

O problema CREADO POR ELES AO NON TER FEITO OS CONCURSOS DE TRASLADOS A TEMPO é gordo e de moi difícil solución en canto a que falamos de ordes xudiciais de medidas cautelares de obrigado cumprimento.

Dende a CIG pedimos que se non é posible rebaremar o concurso, a solución non é excluír a persoas que concursaran a esas prazas e plantexamos a opción de duplicar prazas alí onde sexa necesario e que se lles adxudiquen. Porque estas persoas son perxudicadas e non é responsabilidade delas.

Sobre outras cuestións pendentes non dá información de previsión de tempos. Quedou clarificado que a elección de destinos dos procesos posteriores aos procesos de estabilización, non serían simultáneos cos concursos e coa estabilización. É dicir, que agora queren solucionar: primeiro os concursos de traslados, e despois, seguindo a orde na que foran convocados os procesos selectivos, serían os destinos provisionais, estabilización por concurso, e estabilización por concurso-oposición. Unha vez finalizado todo isto comezarían cos destinos definitivos dos procesos selectivos posteriores (maioritariamente procesos coa forma de oposición).