Novas por contido

O Partido Popular de Vigo deu a benvida aos 16 novos funcionarios e funcionarias dos subgrupos C1 e C2 que xa prestan servizo en diferentes departamentos da Xunta en Vigo

Ao finalizar o acto, varios membros da “Junta Directiva” do PP local, participaron nunha foto de familia cos novos funcionarios e funcionarias da Xunta e algúns xefes e xefas propicios/as de diferentes departamentos. Do evento, que foi publicado no web do PP de Vigo o martes 11 de xuño, fíxose eco a Xunta de Galiza no seu web

Destaca a sintonía entre Xunta e PP en Vigo, que apreciamos en que a información publicada nos dous webs conten a mesma redacción e fotografía de familia (un magnífico traballo do gabinete de prensa que todos/as pagamos á delegada territorial e usa o PP)

O Partido Popular de Vigo fixo público o acto de benvida ao que someteron aos novos funcionarios e funcionarias ao servizo da Administración Autonómica en destino provisional en Vigo. No acto participaron varias persoas que forman parte da “Junta Directiva” do partido en Vigo, como son: Ana Ortiz (Presidenta do PP en Vigo e delegada territorial), Fernando González Abeijón (secretario territorial), e Ángeles Rouco (xefa territorial de Política Social). Acompañando ao Partido Popular no seu acto, participaron outras persoas que exercen diferentes xefaturas na Administración Autonómica.

A información publicada polo Partido Popular indica que a súa presidenta en Vigo, Ana Ortiz, recibiu aos funcionarios e funcionarias e deulles a benvida no edificio administrativo da Xunta na cidade. “Somos un equipo e podedes contar con todos nós para calquera dúbida ou necesidade que teñades, lembrade sempre que somos servidores públicos e o noso traballo é responder aos cidadáns”, sinalou.

Pero a mellor noticia foi para as funcionarias e funcionarios do subgrupo C2, que pola súa condición de “funcionarios en prácticas”, cobrarán só unha parte das súas retribucións durante un mes. Para este persoal a información trasladada polo Partido Popular indica que “xa desempeñan as súas funcións dende os primeiros días do mes de xuño”. Esta información, que coincide coa que tamén publica a Xunta no seu web, ten moita incidencia co regulado no artigo 16.2 do Decreto 95/1991, que di que “se as prácticas se realizan desempeñando un posto de traballo”, as retribucións non serán unicamente as básicas (soldo e extras), se non tamén as complementarias (é dicir, o salario íntegro cos complementos de destino e específico).

Como non pode ser doutro xeito, queremos felicitar ao Partido Popular de Vigo pola benvida aos novos funcionarios e funcionarias da Administración Autonómica en Vigo, e sobre todo por recoñecer que “xa desempeñan as súas funcións” os/as do subgrupo C2 que están en prácticas e así permitirlles cobrar as retribucións completas.

Benvidos e benvidas, da CIG-Autonómica (se nos necesitas, estamos no local sindical do 8º andar da torre 2)

Outras novas recentes

Luns, 15 Xullo 2024

Instrucións sobre a confección de nóminas para o ano 2024 e actualización das contías das retribucións

No DOG do 15/07/2024 publican a ORDE do 11 de xullo de 2024 pola que se ditan as instrucións sobre a confección de nóminas do persoal ao servizo da Administración autonómica para o ano 2024 e se actualizan as contías das retribucións en aplicación do Real decreto lei 4/2024, do 26 de xuño. O 27 de xuño do 2024, publicouse no Boletín Oficial do Estado o Real decreto lei...
Martes, 16 Xullo 2024

Función Pública altera os criterios da estabilización, sen dar moitas explicacións

Cando a Dirección Xeral do Emprego Público e Administración de Persoal (DXEP) publicou o pasado 9 de xullo o baremo provisional do proceso de estabilización da categoría de xefe/a de brigada, saltaron as alarmas polo feito de que a experiencia profesional que se lle asignaba a moito persoal era superior á esperada, mesmo por riba da declarada polas propias persoas afectadas...
Mércores, 17 Xullo 2024

RPT de Educación (proposta 16/07/24)

A Consellaría de Educación, Ciencia, Universidades e Formación Profesional, convocounos a unha xuntanza para o día 18/07/24, para tratar unha proposta de modificación da súa relación de postos de traballo (RPT). Ao coincidir con outras xuntanzas para o mesmo día, as organizacións sindicais solicitamos mudar a data. Descargar a proposta. De entrada, na proposta queren...