A CIG solicita a negociación urxente dun acordo de condicións de traballo para o persoal da Consellaría de Medio Ambiente e Cambio Climático e a negociación da RPT para solucionar a discriminación entre o seu persoal

Ante a funcionarización chapuza, a inminente estabilización, a creación de novas escalas con funcións imposibles e a falta dun horizonte claro para o persoal da Consellaría de Medio Ambiente e Cambio Climático (CMACC), a CIG ven de rexistrar unha solicitude para reactivar con urxencia a negociación da RPT e a negociación dun acordo de condicións de traballo para o persoal.

Sobran os motivos…

O desembarco do persoal funcionarizado e estabilizado na CMACC resúmese nun “ti tira pa diante que malo será”. Agora o resultado en RPT é pura discriminación entre postos da mesma escala e especialidade que teñen as mesmas responsabilidades e funcións. Para incidir máis nesta desorganización  estableceron especialidades con funcións abusivas propias de grupos superiores, como solución ás necesidades, pero a prezo de saldo!

Comecemos polas novas escalas creadas na LEPG no 2022 pois necesitan unha revisión de urxencia. Parece que a tormenta de ideas que tiveron na consellaría con fución pública non tivo asesoramento profesional, pois entre outras funcións decidiron que era unha idea xenial incluír o manexo de embarcacións e tractores forestais para todos, pero sen ter en conta a necesidade de formación profesional, a asunción de responsabilidades ou as obrigas legais de quen manexa.

Seguimos coas RPT, no último semestre de 2024 realizáronse dúas modificacións de RPT xenéricas que afectaron notablemente a RPT da CMACC. As modificacións non foron negociadas, pois consideráronse de urxencia coa excusa da funcionarización e da estabilización (Lei 20/21).

Por unha banda a RPT de funcionarización certificou a discriminación entre postos homólogos. O motivo foron as diferentes sentenzas gañadas polo 90% do persoal que lles recoñecen dereitos económicos polas funcións propias da categoría. A CIG solicitou expandir o dereito a todo o persoal con iguais condicións, o que suporía evitar a discriminación cun custe mínimo no orzamento, máis non fomos escoitados. En consecuencia agora na RPT existen oficiais nivel 18 e de nivel 12 e uns gardas de rrnn nivel 16  e con “mochila de funcionarización” de 1400 euros/ano e outros con 4 niveis menos e sen “mochila”. No laboral as condicións son as mesmas!

Por outra banda a creación de postos en RPT paralizada en 2022, despachárono nunha semana. Os postos creáronse en niveis base, acentuando máis a discriminación e no caso dos postos do Parque Nacional Illas Atlánticas, afiánzase como un “destino laboral precario no paraíso natural”, postos ata 6 niveis por debaixo dos seus homólogos e a non aplicación do acordo de condicións de traballo xa pactado, pero ben gardado no conxelador dende 2023.

E agora, cal é o plan? A mesma responsabilidade desigual retribución?

Co fin de mellorar as condicións de traballo do persoal e equilibrar a RPT desta consellaría  a CIG esixe:  

- Convocar con urxencia a Mesa de negociación  para o acordo de condicións de traballo do persoal da CMACC.
- Convocar con urxencia a Mesa de negociación de modificación da RPT da CMACC