A CIG ESIXE QUE EMPREGO PÚBLICO RECÚE E QUE O PERSOAL FIXO DO CONSORCIO POIDA PARTICIPAR NO CONCURSO DE TRASLADOS DAS ESCALAS SOCIAIS
A uns días de celebrarse a funcionarización do personal laboral fixo procedente do Consorcio, o vindeiro 5 de xullo, a Dirección Xeral de Emprego Público rompe os compromisos acadados e decide deixar fóra do Concurso das escalas sociais a todo o persoal Consorcio.
Iso si, despois de poñer os postos que veñen do Consorcio á disposición de quen queira concursar, máis de 1.700 prazas, a maioría vacantes.
Esta intención de Emprego Público de impedir que as 171 compañeiras fixas do Consorcio participen no concurso das escalas sociais é intolerable e incumpre os compromisos acadados pola Dirección Xeral coa representación do persoal para a integración do Consorcio. De feito este era un dos motivos determinantes polo que o persoal aceptou a funcionarización.
Despois de 17 anos sen mobilidade nestas escalas, non se pode deixar fóra a este persoal fixo por non querer esperar unhas semanas. Ter présas agora cando en moitos dos concursos convocados tardan máis dun ano en publicar as listas de admitidos e excluídoss, é un despropósito.
A quen afecta a premura en convocar o concurso das escalas sociais antes de funcionarizar as laborais fixas que quedan e que podan participar? Se o concurso se fai en “dúas partes”, as que participen na segunda quedaríanse cos restos do concurso anterior e iso limitaría as posibilidades de mobilidade. Ou é que a intención é deixalas anos colgadas á espera do vindeiro concurso?
E que pasaría co persoal que está nos procesos de estabilización?Atreveranse a dar a escoller os postos aos que non puideron optar as persoas fixas procedentes do Consorcio? Ou van facelas esperar a tomar posesión a que rematen os dous concursos?.
Se mire por onde se mire, isto non ten sentido ningún. Queremos pensar que non o meditaron ben e que foi algo apurado de última hora que xurdiu nunha mesa allea ás negociacións de concursos e que ao final van recuar.
Pero se non atenden as nosas demandas o conflito está servido e dende a CIG anunciamos mobilizacións ata facer respectar os compromisos acadados co persoal.
