Tras unha sentenza firme a Dirección Xeral de Emprego Público xa autorizou 3 comisións de servizo na escala de axentes forestais (corpo de auxiliares técnicos da escala C2)
A CIG protesta pola decisión de Emprego Público e solicítalle unha reunión urxente coas consellerías para arranxar a situación anacrónica das RPT, valorando eliminar o C2 nos postos que non están ocupados por axentes forestais e barrar xa os postos ao B.
A Dirección Xeral de Emprego Público e Administración de Persoal (DXEP) confirmou na Comisión de Persoal do 04.07.2025 que se están a cubrir prazas de axentes forestais no C2 por comisión de servizos en virtude dunha sentenza firme. Rexeitamos calquera actividade nunha escala extinguida e vimos de solicitar unha solución URXENTE para que non se poidan ofertar prazas de axentes forestais (C2) e para avanzar na integración do persoal na escala de axentes técnicos ambientais (B) e posibilitar a toma da posesión do proceso selectivo en marcha.
- A Lei da escala de axentes forestais (Lei 12/1992) e a de axentes facultativos medioambientais (Lei 2/2000), están derrogadas a día de hoxe pola Disposición derogatoria primeira da Lei do emprego público de Galiza (LEPG), polo que estas escalas xa non existen na LEPG (agás a referencia a extinguir no C1).
- Fixéronse varios procesos de promoción interna para posibilitar a integración do persoal da escala de axentes forestais (C2) á escala de axentes facultativos medioambientais (C1). Mantivéronse todos os postos nas RPT barrados tamén ao C2 (polo concurso traslados dos C2).
- Nos procesos selectivos da Lei 20/2021 non ofertaron prazas de axentes forestais (C2) por ser unha escala extinguida.
- Que titulación requiriu a DXEP para ás comisións de servizo do C2? Ao estar derrogada a Lei 12/1992 a única referencia legal para un C2 é o artigo 42 da LEPG que é a ESO. Non ten sentido ningún, e de xeneralizarse suporía a desprofesionalización e eliminar a posibilidade de emprego do persoal das listas de contratación.
| ESCALA | TÍTULO REQUIRIDO | NORMATIVA DE REFERENCIA | SITUACIÓN |
| Axentes forestais (corpo de auxiliares técnicos) | Capataz forestal | Lei 12/1992, do 9 de novembro, de creación de determinadas escalas… | EXTINGUIDA pola letra c) da DD1ª da LEPG. |
| Axentes facultativos ambientais (corpo de axudantes de carácter facultativo) | Técnico Superior en Xestión e Organización dos Recursos Naturais/Técnico especialista | Lei 2/2000, do 21 de decembro, pola que se crea a escala de axentes facultativos medioambientais |
A EXTINGUIR: DA 9.8 b). (Lei 2/2000 derrogada pola g) da DD1ª da LEPG) |
| Axentes técnicos ambientais (corpo de técnicos de carácter facultativo) | Técnico Superior en Xestión Forestal e do medio Natural ou equivalente | LEPG |
PREVISTA NA DA9 (pendente de activar) |
Na CIG defendemos a profesionalización das escalas e rexeitamos unha volta atrás de 25 anos!!!
