Na xuntanza que tivo lugar  o día 18 de setembro o Comité de Saúde e Seguridade do persoal de incendios tratou como únio punto o estudio dos accidentes acontecidos durante a campaña de alto risco.

Por parte da Administración entrégase un relatorio de accidentes que é unha mera enumeración dos mesmos, moi breve e con moi poucos detalles. A continuación o Servicio de Prevención informa que os accidentes acontecidos con situación operativa 2, ao tratarse dunha emerxencia está excluída da Lei de Prevención de Riscos, segundo o indicado no artigo 3 da citada lei, tal como establece a norma básica de protección civil, aínda que se manifesta, que o Servizo de Prevención fará a investigación que se lle solicite de igual maneira. Nestas circunstancias é a Inspección de traballo o órgano axeitado para levar a acabo calquera investigación dos accidentes que se produzan.

A CIG, solicita un estudio moito máis exhaustivo dos accidentes significativos. É evidente que non chega coa táboa de Excel entregada por parte da Administración onde fai unha relación de datos totalmente escasa. É absolutamente necesario facer estudios dos accidentes significativos, para aprender do sucedido e tentar mellorar no ámbito da prevención. Volvemos a insistir en que a mellor prevención apoiase nun mellor coñecemento, polo tanto é vital fortalecer un plan formativo axeitado á evolución desta tipoloxía de lumes forestais e das diferentes emerxencias no ámbito rural.

Demandamos que se inclúan dentro do estudio dos accidentes ás brigadas helitransportadas de empresas privadas e brigadas municipais. En especial o acontecido á brigada municipal de Ourense e á brigada de Castromaior.

Tamén denunciamos que existe un problema no sistema de freado nos vehículos autobombas, chamados coloquialmente “Velutinas”. Dispomos de 11 vehículos identificados coa súa matricula cos citados problemas de freado. Dende a CIG solicitamos unha revisión inmediata, de todos os vehículos por parte da empresa licitadora. Estes vehículos teñen garantía en vigor e débese axilizar esta revisión de forma inmediata, e corrixindo dunha vez por todas estes fallos críticos que poñen en risco a vida non so das traballadoras e traballadores senón do resto de conductoras/es.

En canto aos incidentes derivados de queimaduras a través do EPI actual, a CIG, remítise ao acordado no subcomité de EPIS, volvendo a reflectir, que este asunto é un problema complexo con múltiples variables, pero que todas parecen pivotar sobre a limitación da capacidade de disipación de calor, fundamentalmente derivado ao noso parecer dun patrón moi axustado. Segundo a normativa, estes deben ter unha conformación folgada dos EPIS, sobre todo nas mangas, e retirar os reflectores do antebrazo. Ademais, como xa indicamos no subcomité de EPIS, débese evolucionar nos seguintes pregos de condicións para ter EPIS con máis resistencia térmica, pero sin perder a súa capacidade de transpirabilidade e lixeireza.