No DOG do 12/03/2026 publican a RESOLUCIÓN do 9 de febreiro de 2026, da Dirección Xeral de Emprego Público e Administración de Persoal, pola que se abre o prazo para modificar os ámbitos e os datos persoais facilitados nas solicitudes de inclusión das listas reguladas polo Decreto 37/2006, do 2 de marzo, para o nomeamento de persoal funcionario interino do corpo auxiliar da Administración xeral da Comunidade Autónoma de Galiza, escala de persoal de servizos xerais (PSX) (subgrupo C2), e do corpo de auxiliares de carácter técnico de Administración especial da Administración xeral da Comunidade Autónoma de Galiza, escala de xerocultor ou xerocultora (subgrupo C2).
Poderán presentar estas solicitudes as persoas que solicitaron a inclusión nestas listas no prazo do 30 de novembro de 2021 ao 23 de decembro de 2021.
Así mesmo, tamén poderán presentar as ditas solicitudes as persoas que presentaron a solicitude nas categorías laborais 43 e 44 de persoal laboral do grupo IV desde o 19 de marzo ao 30 de abril do 2019 e que figuraban exentas de presentar a solicitude no ano 2021, segundo o punto 1.2 da Resolución do 23 de novembro de 2021, da Dirección Xeral da Función Pública, pola que se acorda a apertura de novas listas para a incorporación de solicitudes para o nomeamento de persoal funcionario interino do corpo auxiliar da Administración xeral da Comunidade Autónoma de Galiza, escala de persoal de servizos xerais (PSX), e do corpo de auxiliares de carácter técnico de Administración especial de Administración xeral da Comunidade Autónoma de Galiza, escala de xerocultor ou xerocultora.
As persoas interesadas en modificar os seus datos e ámbitos deberán presentar a instancia por vía electrónica a través dos formularios de Modificación de datos persoais e de Modificación de ámbitos contidos no portal web da Dirección Xeral de Emprego Público e Administración de Persoal, www.xunta.gal/funcion-publica, dentro da epígrafe <Formularios e solicitudes>.
O prazo para a presentación de solicitudes será de dez días hábiles e comezará o día seguinte ao da publicación desta resolución no Diario Oficial de Galiza.
