Novas por contido

O venres 13 e xoves 19 tivemos dúas reunións coa Consellería de Emprego para abordar a modificación da RPT. A consellería retoma, despois de máis dun ano e medio e de retirar case 200 postos do concurso de traslados de corpos xerais, a modificación da RPT, especialmente relevante para as oficinas de emprego. A modificación farase ao amparo dun plan de reasignación de efectivos que leva aparellada a RPT.

 

Os agravios: non corrixir mediante unhas pequenas modificacións produce un efecto contrario ao pretendido

A súa intención é crear un “modelo igualitario” de oficina de emprego que basicamente vai derivar en dous tipos de oficina.

O obxectivo declarado é pór en valor e facer atractiva para o persoal funcionario a provisión dos postos das oficinas de emprego. Para lograr isto acometen unha modificación que implica unha suba de niveis de grande parte dos postos das oficinas. Ata o de aí de acordo. E optan por un modelo que queren reproducir mecanicamente onde, por exemplo, en determinadas oficinas haberá entre un e tres coordinadores/as.

Se o que se pretende é facer atractivos os postos, motivar ás persoas empregadas que desempeñan o seu traballo nas oficinas, crear un clima laboral positivo, e fomentar a implicación do persoal no traballo, parece que non o van conseguir por algúns detalles que poden parecer insignificantes.

Se as mellores non son globais ou non existe un criterio cabal e obxectivo para aplicar a unhas prazas ou a otras as modificacións, o que vai producir esta modificación é que algunhas persoas das oficinas vexan isto como un agravio.

Non se pode pretender facer unha reforma deste calado con criterios mecánicos e con perspectiva matemática para que só poida haber como moito tres coordinadores por oficina. Para a CIG levar adiante isto parece requirir unha etapa transitoria onde se implante paulatinamente o modelo proposto. E co paso do tempo chegar a el, pois poden transformar eses postos en postos de xestores/as de emprego cando queden vacantes.

Se un modelo de oficina desmotiva e non crea un bo clima laboral entón non é un bo modelo.

 

Os datos e as nosas demandas

As modificacións propostas en relación aos postos rebaixan a expectativa creada o ano pasado e basicamente son:

  • As 130 prazas da escala técnica de orientación pasan a ter nivel 20. As persoas da escala técnica teñen ademais 69 prazas de nivel 22 ou superior abertas a esta escala pero tamén á superior e a xeral, co cal por estatística é posible que só queden menos dun terzo para que poidan optar a elas as persoas da escala técnica. Polo tanto para favorecer a carreira vertical propoñemos abrir máis postos a esta escala.
  • En relación ao postos que estaban abertos a corpos xerais e á escala técnica de orientación manifestan que o feito de non incluír á escala superior foi un erro. Foi corrixido na nova documentación enviada.
  • Os xestores/as de emprego con niveis 12, 14 e 16 pasan a ter nivel 18 abertos ao C1 e C2 e son 238 postos de traballo, dos que 48 son de nova creación. As que actualmente ocupan 12 persoas do A2 en destino definitivo denominaranse igual ata que queden vacantes e pasen a C1/C2. Consideramos que os postos de xestores/as ao ter un nivel equivalente a un negociado deberían estar abertos tamén ao subgrupo A2 para entre outras cousas facilitar a promoción interna sen ter que cambiar de posto.
  • As prazas de coordinador/a pasan de ter nivel 16 e 20 a nivel 22 abertos a A1/A2/C1 de corpos xerais e no futuro non serán A1. Excepto en 10 pequenas oficinas haberá entre unha e tres prazas por oficina. Son ao redor de 70 prazas. Hai case 30 postos de coordinadora de área que tamén son postos A2/C1/C2 de nivel 20, que permanecen igual e que de quedar vacantes pasarían a ser de xestores/as de emprego con nivel 18.
    Parece claro que si as persoas que o ocupan son do C2 ese posto non pode exceder o nivel 20. Pero habendo persoal funcionario de carreira do C1 e A2, pois tamén se sinte o agravio de non ver valorado o seu traballo. E a administración debería facilitar os datos de cantas desas prazas están cubertas en destino definitivo por persoal do subgrupos C1 e A2 e convertelas en prazas de coordinador/a co nivel 22.
  • O mesmo sucede con ao redor de 15 postos base A1 que non se tocan.
  • Os 53 postos de dirección van ser de concurso específico para corpos xerais e escalas de orientación e serán de nivel 25 (A1/A2/C1) para oficinas tipo C e D, e 28 (A1/A2) nos tipos A e B. Estarán abertas a corpos xerais e ás dúas escalas de orientación. Pontevedra Concello, Vilagarcía e Carballo seguirán como C1 nivel 25 ao estar ocupadas en destino definitivo. No relativo aos postos de directores/as de nivel 20 a administración pretende darlles un posto de mesmo nivel na mesma oficina pero non de dirección. Creemos que estes postos deben seguir na mesma situación ata que queden vacantes.
    E non estamos de acordo en que os postos se cubran mediante un sistema arbitrario que non deixa de ser unha libre designación disfrazada. E mentres a Xunta pretenda seguir mantendo que os postos de nivel 28 se cubran por ese sistema non nos queda outra que solicitar que sigan sendo de nivel 25 e que cos cartos aforrados se poida, por exemplo, reforzar o SMAC que tamén vai ser necesario.
  • Créanse 8 postos de persoal subalterno nivel 10 e mantéñense os que están cubertos en destino definitivo. Aquí nada cambia. E parece que deixalos no nivel base non vai facer que se cubran, tal e como pretende a consellería. Dende a CIG pensamos que subir o nivel dos postos desta escala do nivel 10 ao 14 non ten un custo relevante e si pode facer que se cubran as prazas no concurso de traslados E non facelo vaise sentir tamén como unha discriminación ao non haber posibilidade deste persoal de escalar na estrutura de niveis do emprego público.
  • Créanse unha praza de coordinador/a do SPEG por departamento territorial, para a coordinación de oficinas. Contra o noso criterio non van estar nos departamentos territoriais senón en Servizos Centrais.
  • Dos 271 postos que se modifican atenden a demanda de que permaneza o persoal interino ata o concurso de traslados do ano que vén onde se cubran con carácter definitivo.
  • O proceso de amortizacións e creacións produce un saldo negativo de 40 postos que vai repercutir na carga de traballo de moitas oficinas. Na estrutura da consellería amortizan 39 postos e crean 66 postos entre Servizos Centrais e departamentos territoriais.
  • Nas oficinas de emprego amortizan 123 postos e crean 56.
  • Trasladan catro postos de oficina, un da OE de Lugo Norte a Lugo Sur, outro á inversa, un da OE de López Mora á OE do Calvario e outro á inversa. Non estamos conformes se non hai consentimento das persoas titulares.
  • Crean dúas prazas no SMAC de Vigo pero seguen sen reforzar os demais, cando a carga de traballo é cada vez maior.

 

Creación da Oficina de atracción do talento

Como en marzo do 2027 a CCAA asumirá a xestión das autorizacións de permisos de traballo para persoas estranxeiras, na RPT da consellería créase a Oficina de atracción do talento con 50 prazas (15 en SSCC).

Esta oficina terá 4 grandes áreas, a de atracción do talento, que implica contacto con outros países e empresas para a busca de traballadores noutros países, a telemática a de autorizacións e a de resolución de recursos.

Na primeira, terceira e cuarta áreas crean 2 negociados en cada unha e na de competencia telemática 2 de xestores e 2 de técnicos de orientación. Na estrutura periférica da oficina crean en cada unha das 7 grandes cidades 2 negociados e terán 3 persoas contratadas a través de Retorna, que é un programa financiado con fondos FSE dependente da Secretaría Xeral de Emigración, e por tanto esas prazas non aparecen na RPT. Crean postos abertos a administración do Estado e de CCAA que a administración xustifica dicindo que son na oficina do talento e para dar cabida á funcionarios do Estado de Estranxeiría que queiran vir. Na reunión do xoves atenderon parte da nosa demanda e finalmente quedan en só 11 postos abertos.

 

En decembro a seguinte reunión

Dende a CIG reiterámonos nas nosas propostas de hai un ano, cos matices derivados dos novos cambios. A administración vai estudar as alegacións e a próxima xuntanza coa consellería será na primeira semana de decembro. Esperemos unha profunda reflexión sobre o modo de implantar o novo modelo.

E para unha valoración correcta compre que a consellería nos aporte a documentación solicitada.

Outras novas recentes

Venres, 13 Novembro 2026

RPT Emprego, Comercio e Emigración (11/11/26)

A Consellería de Emprego, Comercio e Emigración, convocou aos sindicatos a unha xuntanza para falar da súa proposta de modificación da Relación de Postos de Traballo da consellería. Descargar Contactamos coa consellería para pedir explicacións polo feito de que nos convocasen con menos de 48 horas de antelación (restando a xornada de Folga Xeral), o que imposibilita estudar...
Xoves, 19 Novembro 2026

Aplicación do Decreto 37/2006 e listas definitivas de PSX e xerocultura

No DOG do 19/11/2026 publican: - RESOLUCIÓN do 13 de novembro de 2026, da Dirección Xeral de Emprego Público e Administración de Persoal, pola que se dispón a aplicación do Decreto 37/2006, do 2 de marzo, na cobertura dos postos do corpo auxiliar da Administración xeral da Comunidade Autónoma de Galicia, escala de persoal de servizos xerais (PSX), e do corpo de auxiliares...
Xoves, 19 Novembro 2026

Oposicións acceso libre: corpos superior, xestión, administrativo, auxiliar; escala FOL; enquisador, (para 24/11/26)

A Dirección Xeral de Emprego Público e Administración de Persoal convocou Mesa Xeral e Mesa Sectorial para discutir as bases das convocatorias dos seguintes procesos selectivos. Se é do teu interese, podes contactar coa CIG: Corpo superior-A1. Acceso libre. 60 prazas. Oposición. Descargar Corpo de xestión-A2. Acceso libre. 57 prazas. Oposición. Descargar Corpo...