- Detalles
Retomarase a revisión dos postos no mes de setembro cun grupo de traballo
O venres 5 de agosto tivo lugar unha nova xuntanza con Función Pública para tratar a revisión dos últimos listados de prazas da OPE extraordinaria 2022 publicada o 30 maio.
Unha das primeiras cuestións é a da retirada de 354 prazas do persoal das brigadas de 6 meses creadas no 2019 no servizo de incendios. Función Pública manifestou que querían un pronunciamento dos sindicatos, xa que entenden que pode haber inseguridade xurídica ao incluílas na oferta, e seguían estudando as diferentes opcións.
Por parte da CIG facemos un chamamento á cautela e manifestamos que nós o que queremos é igualdade no tratamento da convocatoria destas prazas. Non pode ser que se fagan parceliñas e que o persoal se pelexe por un puñado de prazas. .
Seguimos mantendo que nos preocupan como se vai baremar o tempo de traballo segundo os criterios comúns desta oferta xa que pode xerar inseguridade e discriminacións.
Con respecto ao Consorcio nos comunican que aceptaron aproximadamente o 90% das alegacións.
A maiores Función Pública nos trasladou a seguinte información:
- Aínda están a traballar no listado dos entes (enviarano nos vindeiros días, din)
- No mes de setembro farase un grupo de traballo técnico con persoal de Función Pública e dos sindicatos para valorar cada unha das alegacións denegadas.
- É probable que nas convocatorias publiquen o listado das prazas da OEP cos postos identificados para dar maior seguridade xurídica.
- Detalles
O traballo de noite, en quendas semanais e os sábados á mañá, ademais das funcións de inspección, levantamento de actas e control de establecementos públicos adicados ao lecer e hostalería xa ten recoñecemento para o persoal inspector da Axencia de Turismo da Galiza. A CIG ven de ratificar na Comisión de Persoal do 3 de agosto a regulación das súas condicións de traballo xunto co recoñecemento salarial nun Acordo vinculante no que o persoal vai percibir un complemento salarial adicional de 368,54 € ao complemento específico.
Mais coidamos que o camiño de ir parcelando negociacións e acoutar acordos por escalas ou grupos de postos fai que as condicións laborais dependan da presión que exerce cada colectivo de traballadoras e traballadores, ou da necesidade que a Xunta teña polo servizo que aportan. E lembramos que este ano é Xacobeo, e que o turismo é a “ficha” pola que aposta a Xunta para a economía da Galiza. No entanto, o seu recoñecemento era unha demanda histórica do persoal e da CIG.
A intención inicial dos responsábeis da política de persoal da Xunta era impoñer un texto sen negociación coas organizacións sindicais. Pero na CIG coidamos que é necesario facer algo máis amplo, polo que na negociación introducimos a necesidade dun estudo para harmonizar coherentemente os niveis do complemento de destino de todos os postos de inspección da Xunta. O director xeral de Función Pública comprometeuse finalmente a realizar ese estudo global das circunstancias de todos os postos de inspección, e os niveis correspondentes, que teñen que ser compatibles cos complementos adicionais polas especiais condicións de traballo do posto.
Necesitamos un Acordo Marco co que regular as condicións laborais e retributivas de todos os empregados e empregadas públicas, e isto ten que implicar unha revisión dos niveis non só a determinados corpos e escalas, se non a todo o persoal ao servizo da Administración Autonómica de Galiza. Da necesidade de abordar globalmente este tema da conta a decisión da Xunta de baixar o nivel mínimo de complemento de destino existente na Administración Autonómica, que pasa do actual 10 ao novo 9, e afectará principalmente a algunhas escalas de Política Social e Educación.
- Detalles
A Axencia de Turismo de Galiza (ATURGA) decidiu destruír 6 postos de traballo e crear 2, o que é unha destrución neta de 4 postos.
A proposta inicial era ainda peor: decidiran eliminar 8 postos de traballo, todos eles na propia ATURGA, e case todos da escala de inspección de turismo. A proposta final pasou a destruír 6 postos, dos que 1 é en ATURGA e outros 5 da Presidencia da Xunta. Destruír dous postos menos (serán 6, e non 8), para crear 2, e que dos 6 que destrúen 5 deles serán en Presidencia e non en ATURGA (como se importaran menos), foi xustificación abonda para algún sindicato para votar a favor.
A maiores, modifican algúns postos de traballo das oficinas de turismo, para aplicar o acordo das súas condicións de traballo, o que implica introducir o "horario especial e xornada partida". O acordo que o regula fala de que eso será voluntario para os postos ocupados, e obrigatorio para os vacantes. Pero meten no saco postos que foron collidos no último concurso de traslados que cando foron solicitados non tiñan ningunha observación de horario. Certo que se comprometen a non aplicarlle as novas condicións obrigatoriamente a estes últimos, pero a CIG pediu que como mínimo, ese "horario especial e xornada partida" que van meter na RPT, quede clariño que será "cando quede vacante.."
Toda esta proposta foi votada na Comisión de Persoal do 3 de agosto, e contou coa abstención de CCOO e o voto favorable de CSIF e UGT. A CIG votou en contra.
- Detalles
Mentres que noutras administracións (local, universidade..) o nivel inferior de todos os grupos é o 14, tanto no complemento de destino como no específico, a Xunta pretende unha baixada do actual nivel 10 da Agrupación Profesional, ao un ainda menor nivel 9.
Esta regresión retributiva é como consecuencia da funcionarización do persoal laboral fixo pactada por Xunta, CCOO e UGT no Acordo de Concertación, que afecta de cheo ás categorías do persoal de limpeza daqueles centros de traballo nos que non se perciben pluses pola singularidade do posto.
A proposta xa pasou pola Mesa Sectorial de Negociación de Persoal Funcionario o día 3 de agosto, mediante un proxecto de decreto que modifica o actual regulamento de provisión de postos de traballo, promoción profesional e promoción interna, do ano 1991 (descargar proposta). Todos os sindicatos amosaron a súa disconformidade, agás o SEPGA que se limitou a pedir datos.
A diferenza retributiva entre o persoal laboral do grupo V sen pluses, e o persoal funcionario da agrupación profesional, nivel 10 de CD e CE é de 710 €/anuais a favor do persoal funcionario. Esta diferencia retributiva sería amortizada polo distinto valor de trienios nun prazo de 9 anos; así o trienio da agrupación profesional ten unha valoración de 15,08 €/mes mentres o do persoal laboral é de 31,88€. Polo tanto, a perda anual do persoal laboral será de 235 € que no prazo de 9 anos se achegaría aos 710 € que percibiría a maiores como persoal funcionario no caso de funcionarizarse o laboral do grupo V.
En definitiva, esta rebaixa do nivel mínimo non só afecta ao persoal laboral funcionarizado (1515 persoas das categorías de limpador e camareiro-limpador), senón que faculta á Administración Autonómica a que todos aqueles postos a crear no futuro do corpo da Agrupación Profesional poidan selo cun nível 9 do CD e CE, precarizando aínda máis as condicións retributivas do persoal con peores condicións económicas da Administración Autonómica de Galiza.
- Detalles
O día 2 de agosto tivemos unha nova xuntanza coa Administración. A maiores do director xeral de Función Pública tamén estivo presente un representante da Consellería de Medio Rural. Nesta reunión deron explicacións sobre o último listado de postos incluídos na OPE extraordinaria de estabilización 2022.
Na CIG reclamamos respostas xa que a OEP publicada non se correspondía coas listaxes previas remitidas aos sindicatos. Con esta nova listaxe “rectificada” incluso se reduce o número total de prazas.
Este proceso de estabilización conta con numerosas eivas, incertezas e ausencia de prazas, o que pode producir danos e discriminacións.
Nas listaxes faltaban todos os entes, e agora din que os enviaran canto antes xa que foi un erro, pero sobor de todo seguen a faltar moitas prazas, as da disposición oitava da Lei 20/21.
Por outra parte, volven mudar os criterios para a introdución de prazas sobre a marcha e unicamente dan explicacións parciais. Eso si, recoñecen o problema e a falta de prazo polo que imos ter para alegar os listados ata o 9 de setembro. Ollo!, todas as achegas deben ir xustificadas e documentadas.
Ademais, din que enviaran xa as respostas as anteriores alegacións. Sería a terceira vez que mudan as listaxes, e polo tanto que se alegan. Unha perda de tempo se imos mudando criterios polo camiño. É evidente que comezaron a casa polo tellado.
Destacar que no caso das prazas retiradas do servizo de incendios (as que crearon no 2019 logo da eliminación da encomenda de SEAGA), Función Pública di que o cambio de criterio para que retiraran 353 prazas (quedando 208) é que só recoñecen as da disposición adicional oitava. Nas que retiran, entenden que non existe continuidade nin subrogación do servizo, e polo tanto non corresponden á disposición adicional sexta. Ao menos resulta curioso. Ante as dúbidas e un chamamento á cautela que manifestamos, os responsábeis políticos da Administración Autonómica van consultar de novo coa asesoría xurídica. O que si quedou clara é que o resto das prazas vanse convocar como estabilización na OPE ordinaria 2022 polo sistema de concurso-oposición.
Na listaxe tamén veñen excluídas 83 prazas de condutor/a de motobomba coa xustificación de que xa estaban convocadas nun proceso selectivo de quenda libre con anterioridade á entrada en vigor la lei.
Pedimos xustificar a ausencia de prazas do Consorcio e tamén que incluíran as prazas das encomendas de temporais, máis a Administración defende que o persoal está incluído ao abeiro da DA8ª (no caso de ter algún máis sen incluír teremos que alegar). Tamén con respecto ao Consorcio comentou que aceptaron 25 alegacións de prazas presentadas polas organizacións sindicais.
Respostan ademais que figuran as iniciais do nome e apelidos das actuais persoas que ocupan as prazas para facilitar a súa identificación nas listaxes.
Para rematar, remitirán esta semana un listado de prazas xustificando as alegacións de cada organización sindical para que poidamos cruzar os datos e telas en conta para novas achegas.
- Detalles
A CIG ven de interpoñer recurso contencioso administrativo contra o decreto da Oferta de Emprego Público da estabilización de 2022.
Ante o baile de prazas e a ineptitude da Xunta para interpretar os obxectivos da Lei 20/2021 de estabilización do emprego público, o 22 de xullo interpuxemos recurso contencioso administrativo co fin de que se aplique correctamente esa norma aprobada polo Parlamento español.
Teñen que emerxer as prazas que deben ser, e corrixir os erros que xa transmitimos as organizacións sindicais. Como exemplo, as prazas da disposición adicional oitava, os problemas de titulacións e incluso ausencias completas ou mal encadradas nos diferentes procesos de estabilización.
Xustiño apenas unha semana despois do noso recurso, Función Pública envía o listado de prazas definitivas.
- Detalles
A Residencia Xuvenil “Florentino L. Cuevillas” é albergue durante o mes de agosto, cando deixa de facer funcións de residencia de estudantes, dentro da REAJ (Red Española de Albergues Juveniles), tanto é así que continúa a publicitarse no seu web oficial.
Pois ben, grazas a xestión da dirección do centro e co visto bo da Xefatura Territorial da Consellería de Política Social de Ourense, o único albergue público de Ourense está pechado.
No ano da recuperación do turismo despois da pandemia, no ano Xacobeo, onde se pretende potenciar a estadía en Ourense, a Consellería de Política Social pecha outro servizo público.
Dende a CIG-autonómica non entendemos como é posible esta política de terra queimada, onde non se coidan os servizos públicos, onde o pouco equipamento público que temos na cidade o pechamos.
Si existen tarefas de mantemento do centro ou calquera outra cuestión que se teña que facer, existen períodos ao logo do ano que se poden realizar e non no momento en que ten que funcionar como un servizo turístico da cidade.
Estas actitudes de desprezo aos servizos públicos dentro da Consellería de Política Social en Ourense non son novos e deberían ter consecuencias, sobre todo en datas tan sinaladas para a recuperación económica da provincia de Ourense, como é este Xacobeo 21-22.
- Detalles
O xoves 27 de xullo tivemos unha primeira toma de contacto na que o director xeral da Función Pública deu resposta ás alegacións das organizacións sindicais ao baremo dos criterios da OPE extraordinaria 2022 (Lei 20/2021). A negociación destas bases xerais para as convocatorias de establización non será ata setembro.
A Administración móvese nestes termos:
1. Pide baremo sinxelo e que permita axilidade para non enredarse durante anos (no que son expertos).
2. Acepta que o coñecemento do Galego sexa requisito e con proba eliminatoria. Tamén no concurso de méritos!!
3. Valor do tempo traballado:
- Muda a súa proposta inicial (que valoraba igual o traballo en calquera admón autonómica) e agora estudan valorar o dobre na administración convocante.
- Segue sen valorar unicamente o tempo traballado como temporal/interina (din que por motivos legais). Valolar o tempo como fixo/a podería producir unha mobilidade entre diferentes administracións furtando prazas a estabilización.
- Négase a valorar o tempo traballado en diferente categoría (de seguir na teima o persoal temporal ou interino que leva anos rotando de categorías quedaría con menos opcións). Porén si aceptan valorar categorías equivalentes, sucesorias ou extintas si se ocupa o mesmo posto.
- Non puntuará o tempo de inactividade do persoal fixo descontinuo.
4. Formación: Admite baixar o número de horas para acadar o máximo e tamén ampliar as entidades válidas para a formación (universidades, consellerías e entes convocantes). Polo de agora manteñen o minimo de 8h/curso.
5. Conciliación: Eliminan a limitación dos 5 anos anteriores para puntuar.
6. No baremo da superación exercicios selectivos eliminan “os 10 últimos anos”.
7. Autoavaliación: seguen insistindo en revisar só o equivalente ao dobre das prazas convocadas co argumento de axilidade ou celeridade e que non é novidade xa que este sistema o emprega o ensino e outras administracions.
8. No apartado da puntuación por estar nas listas van admitir máis listas públicas e decretos anteriores.
9. Desempate: Sorprendentemente dúas organizacións sindicais cuestionaron a obriga legal de favorecer a infrarrepresentación feminina nun corpo e escala e Funcion Publica o vai comprobar. Para desempate falase, logo deste, da maior antigüidade na administración convocante e na praza pero todo isto ainda está en cueiros.
Concurso-oposición:
- Servizos profesionais, formación e conciliación será o único que conte na valoracion de méritos Eliminan o baremos de listas, exercicios e de titulación. No A1 e A2 tentarán que non sexan máis de dous exercicios e no resto un só exercicio. Non eliminan o de “preferentemente” tipo test polo que pode haber outro tipo de exame.
- Parece que aceptarán chegar ao 35-5 no baremo do concurso-oposición.
Concurso de méritos:
- De momento manteñense no 60-40 e os 25 anos para acadar o máximo en servizos profesionais. Non queren modular este máximo para chegar ao tope de servizos prestados diferente segundo o máximo do ente ou categoría/corpo escala.
- Vai irse a un baremo homoxéneo para a administración xeral e entes ou organismos no ámbito das oposicións que convoque FP (AMTEGA, ATRIGA, CONSORCIO…)
- Vai determinar cales van ir con convocatorias separadas (que poderán ser SOGAMA, PORTOS e SEAGA por exemplo), que negociarían o seu propio baremo dacordo cos criterios xerais de funcion publica. Recoñecen que nas de funcion publica teran que dar unha volta ao valor das prazas de entes e van facernos unha proposta para negociar esta cuestión, pero avisa que se non hai acordo, vaino impor (como sempre).
- Detalles
Rematamos o mes de xullo cunha restra de modificacións de Relacións de Postos de Traballo (RPT) que destrúen emprego público, e o que crean é para ser cuberto con persoas doutras administracións e postos de libre designación. A CIG non apoiou ningunha desas propostas que si recibiron apoio doutras organizacións.
Foi na Comisión de Persoal do venres 29 de xullo, onde quedaron aprobadas as seguintes RPT: Presidencia da Xunta; Economía, Industria e Innovación; Medio Rural; Fondo Galego de Garantía Agraria (Fogga); e Medio Ambiente, Territorio e Vivenda. No lote meteron un “Acordo” sobre as condicións de traballo das futuras oficinas agrarias móbiles. A RPT de Aturga quedou para a semana que ven.
RPT DA PRESIDENCIA DA XUNTA
Eliminan 10 postos (todos de concurso), para crear 6 (ningún de concurso). E dos 6 creados, 5 están abertos a persoal doutras administracións. Descargar.
A proposta foi apoiada por CSIF. CCOO e UGT abstéñense. CIG votou en contra.
RPT DA VICEPRESIDENCIA 1ª E CONSELLERÍA DE ECONOMÍA, INDUSTRIA E INNOVACIÓN
Nesta proposta non amortizan postos. Crean 4 postos, dos que 3 están abertos a outras administracións, e ningún é de concurso ordinario (3 de libre designación e 1 de concurso específico). Máis estrutura, e con menos opcións para o persoal propio. Descargar.
Contou co apoio de CSIF e UGT, a abstención de CCOO, e o voto en contra da CIG.
ACORDO DE CONDICIÓNS DE TRABALLO DA OFICINA AGRARIA MÓBIL
Mentres amortizan prazas nas Oficinas Agrarias Comarcais, ou non cubren as que existen, teñen a cara dura de crear uns postos itinerantes, para facer suplencias e para ir polas feiras en sábados, domingos e días de gardar. Todo isto sen compensación económica. Descargar.
CCOO, CSIF e UGT votaron a favor. CIG votou en contra.
RPT DE MEDIO RURAL
Vinculado co punto anterior, aquí se concreta a amortización dos postos das oficinas agrarias comarcais para crear as oficinas agrarias móbiles. Na proposta vai tamén a creación das Unidades de Investigación de Incendios Forestais (UIFO), dotadas de 15 postos (dos que 12 serán de concurso). Pero para financiar esta creación, suprimen 17 postos (que retiran do monte e da extinción de lumes). Por riba, para cubrir estes postos poñen como requisito imprescindible ter feito un curso que só puideron facer 50 persoas, elixidas como lles veu en gana. Descargar.
En total amortizan 83 postos para crear 65. A proposta foi apoiada por CCOO e UGT. Votamos en contra CIG e CSIF.
RPT DE FOGGA
Crean 17 prazas, que financian destruíndo 39 postos. E de paso meten o mérito de permiso de conducir a moitos postos, mesmo a postos base C2 como se tivesen que ir de ruta a facer inspeccións. Descargar.
Nesta ocasión a proposta foi apoiada por CSIF. UGT abstívose. E CIG e CCOO votamos en contra.
RPT DE MEDIO AMBIENTE, TERRITORIO E VIVENDA
Crean 5 postos, dos que 3 están abertos a outras administracións, e só 2 de concurso ordinario. Para financialo destrúen 8 postos de traballo. Descargar.
Ningún sindicato apoia esta proposta. CCOO e UGT abstivéronse. CSIF e CIG votamos en contra.
ASUNTOS RETIRADOS DA ORDE DO DÍA
Antes do comezo da sesión, o director xeral de Función Pública retirou da orde do día a proposta de RPT de ATURGA (Axencia de Turismo de Galiza), e un acordo de incremento retributivo do persoal da escala de inspección de turismo. Segundo nos informou, os asuntos van falarse o martes, e votaranse nunha comisión de persoal o mércores 3 de agosto.
Sobre a RPT de Aturga, a ver o que nos contan para xustificar que se destrúan 8 postos para financiar a creación de dous. E do acordo da escala de inspección de turismo, vermos o que pasa, porque ata a comisión de persoal todo foi de palabra, con cambios de criterio por parte da Administración, sen documentos, sen negociación.
ROGOS E PREGUNTAS
O director xeral de Función Pública informa:
- En vindeiras semanas desbloquearán algúns puntos que quedan da RPT de Illas Atlánticas e o acordo dos axentes medioambientais. En setembro remitirán texto.
- Hoxe publicaron en DOG os baremos provisionais de persoal subalterno, auxiliar de clínica e bioloxía. Na primeira semana de setembro seguirán saíndo, e a finais de setembro estarían todas. Algúns procesos comezarán coa toma de posesión en setembro. Estarían todos rematados ata decembro. Publicarán información aclaratoria sobre os prazos no web de Función Pública.
- Na xuntanza do martes darán unha explicación do listado de prazas da Lei 20/21.
- Sobre as 330 prazas de MR que viñan de Seaga e que di que non cumpren os requisitos da Lei 20/21, di que serán incluídas na oferta ordinaria de 2022. O martes tamén o explicará.
- Detalles
Función Pública vén de trasladar ás organizacións sindicais a relación das prazas correspondentes á OEP extraordinaria 2022 (procesos de estabilización). Descargar.
O prazo para presentar alegacións remata o día 3 de agosto ás 14:00 horas.
Podes facernos as túas achegas a través desta ligazón.
