- Detalles
No DOG do 27/03/2026 publican a RESOLUCIÓN do 26 de marzo de 2026, da Dirección Xeral de Emprego Público e Administración de Persoal, pola que se fan públicas as puntuacións provisionais das persoas participantes admitidas no concurso ordinario para a provisión de postos de traballo vacantes do corpo facultativo/a superior, escala de facultativos/as, especialidades de medicina, de psicoloxía e de pedagoxía; do corpo facultativo de grao medio, escala de técnicos/as facultativos/as, especialidades de enfermaría, de fisioterapia, de traballo social, de educador/a social e de terapia ocupacional; do corpo de axudantes de carácter facultativo, escala técnica de gobernantes/as, especialidade gobernante/a, e do corpo de auxiliares de carácter técnico, escala de auxiliares de clínica, corpos e escalas de Administración especial da Administración xeral da Comunidade Autónoma de Galiza, convocado pola Resolución do 15 de xullo de 2025.
Publican as puntuacións provisionais das persoas concursantes admitidas para cada un dos postos solicitados, no portal web corporativo da Dirección Xeral de Emprego Público e Administración de Persoal na epígrafe de concurso de traslados, https://www.xunta.gal/funcion-publica/concurso-de-traslados/consulta
As persoas interesadas poderán formular reclamación contra as puntuacións provisionais no prazo de 10 días hábiles contados a partir do día seguinte ao da publicación desta resolución no Diario Oficial de Galiza, concretamente ata o 14 de abril de 2026. O formulario de reclamación estará á disposición das persoas interesadas no portal web corporativo da Dirección Xeral de Emprego Público e Administración de Persoal e deberá cubrirse e presentarse electronicamente segundo o establecido na base IV da convocatoria (Tramitación electrónica), https://www.xunta.gal/funcion-publica/concurso-de-traslados/xeracion-de-reclamacions/
- Detalles
A CIG mantivo o pasado mércores 18 de marzo unha reunión coa directora territorial de Sanidade e o xefe de persoal para abordar o teletraballo, a falta de persoal e a situación de distintos servizos.
Teletraballo
Trasladamos a queixa do persoal pola limitación a un único día semanal, unha decisión difícil de entender cando o Acordo vixente permite até o 50% das xornadas e cando a maioría dos postos desenvolven funcións administrativas e técnicas que se realizan de maneira dixital.
A Dirección Territorial indicou que “estudará” a posibilidade de amplialo a dous días, condicionado á organización do servizo e á coordinación desde a Secretaría Xeral de Sanidade.
Falta de cobertura das prazas saúde pública
Confirmouse que existen tres prazas de inspección farmacéutica (FISP) sen cubrir, así como o bloqueo dunha comisión de servizos de xefatura por non poder asumir unha maior perda de efectivos. Pero non son as únicas: sabemos que hai máis comisións de servizo bloqueadas e as queixas do persoal que quere optar e promocionar son frecuentes (ver táboa).
Segundo explicaron, estas prazas levan tempo solicitándose (anos nalgunha) á Dirección Xeral de Emprego Público e Administración de Persoal —está pendente da aprobación da Subdirección Xeral de Recursos—, sen que até o momento se teña producido a súa cobertura.
Postos vacantes na Dirección Territorial de Sanidade
| Posto | Nivel | Nº vacantes |
| Xestor/a de programas de saúde pública | 22 | 1 |
| Inspector/a farmacéutico/a de saúde pública (Ourense) | 24 | 2 |
| Inspector/a farmacéutico/a de saúde pública (Verín) | 24 | 1 |
| Xefe/a de unidade de inspección e control de centros e prestacións sanitarias | 28 | 1 |
| Inspector/a médico/a | 26 | 1 |
| Inspector/a farmacéutico/a | 26 | 1 |
| Xefe/a de grupo | 14 | 1 |
| Xefatura de negociado | 18 | 1 |
| Técnico/a sanitario/a | 22 | 2 |
| Auxiliar de clínica | 12 | 1 |
| Inspector/a veterinario/a de saúde pública (comarca de Ourense) | 24 | 2 |
Dende a CIG valoramos positivamente a disposición ao diálogo da Dirección Territorial e o feito de que se recoñezan os problemas existentes. Porén, tamén constatamos as limitacións dun sistema de emprego público centralizado, no que decisións clave como a cobertura de prazas dependen dun sistema ríxido que non ten en conta a prestación dun servizo público adecuado.
Para a CIG, esta situación é insostíbel. Servizos como a inspección farmacéutica, a vixilancia epidemiolóxica ou a inspección veterinaria de saúde pública son esenciais e deben contar cos recursos necesarios. É salientable que o persoal veterinario de matadoiros teña cobertura prioritaria (sinon paralizaría a actividade empresarial) e o que analiza as augas para o consumo humano non: deben estar todos.
A problemática agrávase en territorios como Ourense, con maiores dificultades para cubrir postos e cunha poboación máis envellecida e rural, o que require reforzar —e non debilitar— os servizos públicos. E temos que ter en conta o tremendo esforzo que fixeron e fan as nosas compañeiras inspectoras farmacéuticas para o control da auga após a vaga de lumes do verán pasado, pois seguimos a ter problemas de potabilidade por arrastres das cinzas en moitas localidades.
A CIG levará estas demandas ás mesas de negociación para que a saúde pública sexa considerada servizo esencial nos orzamentos, facilitando así a cobertura áxil das prazas no futuro, pero estas as deben cubrir urxentemente.
A saúde pública non pode quedar á espera de decisións políticas: é necesario actuar xa!
- Detalles
A Xunta non aumenta persoal para a extinción de lumes
O PLADIGA 2026 non incorpora ningunha praza nova de persoal propio da Xunta para a extinción de lumes no Servizo de Prevención de Incendios Forestais (SPIF). Mantén exactamente os mesmos efectivos que en 2025: 276 brigadas de terra e 12 brigadas helitransportadas.
Nin máis persoal técnico, nin bombeiro, nin emisorista-vixiante, nin axentes de investigación (UIFO) ou directores técnicos de extinción. O único incremento de persoal propio no PLADIGA 2026 concéntrase en 15 postos de axentes UDEX (para xestión de grandes incendios). En total para o período de alto risco contamos entre persoal directivo, xefaturas, técnicos/as, axentes, vixiantes e emisoristas e bombeiros/as forestais, condutores/as de motobombas…etc (tanto persoal laboral fixo-descontinuo como funcionario) cun total de 3.069 compañeiros/as.
A novidade: o reforzo de medios pola empresa pública
O único reforzo anunciado prodúcese a través da contratación externa con 42 brigadas de terra (168 bombeiros/as forestais). Non se trata de persoal propio, senón como indica no propio Anexo de medios do PLADIGA como “empresa pública”. Polo que dixeron este xoves 26 de marzo en mesa coas organizacións sindicais en SEAGA, non teñen coñecemento de que vaia ser con eles, entón… van acudir a contratar por TRAGSA, unha empresa de participación pública (51%) co goberno estatal?
Cambios limitados nos medios aéreos. O plan incorpora algunhas modificacións —como aumentar avións de carga en terra e elimina anfibios,incorpora un helicóptero pesado e un avión de coordinación—, pero sen supoñer un reforzo estrutural do operativo. E segue directamente privatizado, incluso a grande parte do persoal das brigadas helitransportadas: insistimos en que dependan da Xunta.
Máis convenios municipais, pese ao fracaso do modelo. Tras a vaga de lumes de 2025, que puxo en evidencia importantes deficiencias organizativas, a Xunta non só non revisa o sistema de convenios con entidades locais, senón que o amplía. As brigadas municipais pasan de 184 a 190, afondando nun modelo baseado na fragmentación e na descentralización de responsabilidades que xera riscos e descoordinación.
Os convenios trasladan aos concellos a responsabilidade de contratar, formar e equipar ao persoal. Isto provoca atrasos na posta en marcha dos equipos, que en moitos casos non están plenamente operativos ata ben entrado o verán, cando o risco xa é máximo. Ademais, a atomización dos recursos dificulta a coordinación e reduce a eficacia do dispositivo. E temos que destacar os problemas para conseguir persoal ou de xefes de brigada que “foxen” da precariedade e buscan mellores condicións laborais en plena campaña cos chamamentos de substitución no SPIF.
Persoal non profesional en primeira liña. Este sistema baséase na incorporación de persoal non profesional para tarefas de alto risco. Nun escenario marcado polo cambio climático, con incendios máis intensos, rápidos e perigosos, resulta imprescindible contar con persoal profesionalizado. O contrario supón poñer en risco ás propias persoas traballadoras —moitas delas sen experiencia suficiente—, ao conxunto do operativo e á cidadanía.
Accidentes que non se analizan. Os accidentes graves rexistrados durante a campaña de 2025, que afectaron a persoal en intervención directa, evidencian as consecuencias deste modelo. Porén, o PLADIGA 2026 non incorpora unha análise nin medidas correctoras sobre esta realidade.
Vulneración do recoñecemento profesional. A utilización no PLADIGA do nome de categorías como “peón” ou “xefe de brigada” para o persoal que realiza tarefas propias de extinción tanto na empresa pública como nos concellos ou na privada, supón un grave retroceso no recoñecemento profesional. O Código Nacional de Ocupacións e a Lei básica de bombeiros forestais aprobada en 2024 establecen claramente a figura de bombeiro/a forestal como referencia para estas funcións. Non empregar esta denominación implica deixar a este persoal fóra de dereitos fundamentais vinculados á súa actividade, como o horario e descansos, recoñecemento de enfermidades profesionais, a xubilación anticipada ou a protección en materia de saúde laboral.
Un modelo fracasado que non cambia. En definitiva, o PLADIGA 2026 mantén conxelado o persoal público da Xunta, incrementa a dependencia de medios externos e afonda nun modelo atomizado e que xa demostrou as súas graves eivas que nos pon en risco ao persoal e a sociedade galega.
Dende a CIG-Autonómica reiteramos a necesidade dun servizo de incendios forestais 100% público, profesionalizado e único, con igualdade de condicións laborais e salariais e que non dependa de quen te contrata e que, en definitiva estea a altura dos riscos que afronta Galiza.
- Detalles
Avaliacións de riscos psicosociais
Instituto Galego de Formación en Acuicultura (Igafa)
Dende a CIG recordámoslle á Administración que se están a incumprir as medidas acordadas após a avaliación de riscos psicosociais no Igafa. Estas medidas son de obrigatorio cumprimento, polo que esiximos a súa implantación de forma inmediata.
Escola Oficial Naútico-Pesqueira de Ferrol
A resolución de Inspección de Traballo ante a denuncia interposta pola CIG estima obrigatoria a avaliación de riscos psicosociais na Escola Naútica de Ferrol , polo que pedimos que se efectúe dita avaliación de riscos á maior brevidade.
Centro de Investigacións Mariñas (Cima)
Informa a xerente do Cima que se levarán a cabo proximamente obras de reforma e mellora no centro: a reforma dun baño adaptado e a do laboratorio de patoloxía, zona de extracción e zona de despachos.
Recordamos a necesidade dunha avaliación de riscos despois da reforma, así como que se aproveite para a renovación dos equipos existentes para unha mellor eficiencia.
DepartamentoTerritorial da Coruña
Informan dende o Departamento Territorial da Coruña das accións efectuadas para a corrección dos riscos detectados na avaliación de riscos do Departamento. Quedan pendentes de corrixir as altas temperaturas na oficina de persoal biólogo e de pesca de baixura, de trasladar o arquivo para un novo local e da creación dun espazo de laboratorio para o uso do persoal biólogo e persoal técnico de recursos mariños.
Solicitáronse as medicións de radon ao Instituto Social da Mariña, que só facilitou uns resultados do 2019. Pedimos que faciliten todo o informe e que se fagan novas medicións, de ser preciso.
Accidentes de traballo
A vicesecretaria informa dos accidentes de traballo do ano 2025.
Radon
Despois das medicións de radon efectuadas na consellaría e após os resultados obtidos, lévanse a cabo medidas correctoras no edificio de gardacostas en Santiago, na Escola Oficial Náutico-Pesqueira de Ribeira e no Igafa. Infórmase das medidas efectuadas.
A solicitude da CIG, recórdaselle ao Instituto Tecnolóxico para o Control do Medio Mariño de Galiza (Intercmar) a obrigatoriedade para empresas e centros de traballo de efectuar medicións de gas radon.
Formación
Estanse programando novos cursos de formación nas seguintes materias:
- Condución segura
- Resolución de conflitos
- Navegación segura/seguridade marítima
Rolda de intervencións
Dende a CIG tratamos os seguintes asuntos:
- Control de pragas na Escola Náutico-Pesqueira de Ferrol. Esiximos que se siga estritamente a normativa en materia de control de pragas e que todo o proceso se leve a cabo por empresas acreditadas.
- Labores de mostraxe. Débese levar a cabo a avaliación de riscos dos labores de mostraxe en embarcacións menores (planadoras). Lémbrase a necesidade dun seguro que cubra os labores de mostraxe do persoal da Consellaría que realiza este tipo de traballo.
- Roupa de traballo e EPIs. Detectáronse deficiencias na equipación de chalecos salvavidas no persoal que embarca. Recórdaselle á Consellaría que se cumpra a normativa sobre seguridade no mar.
- Volvemos presentar queixas sobre os recoñecementos médicos en Pontevedra e solicitamos que se mellore o servizo. Tamén solicitamos que se preste un mellor servizo nas localidades de Vilagarcía, Ribadeo e zona norte, xa que tódolos anos se presentan queixas polas deficiencias dos recoñecementos de saúde.
- Detalles
A Xunta impón un novo PLADIGA 2026, tras un 2025 marcado polo conflito, o incumprimento de acordos e o caos na xestión da vaga de lumes
Na CIG-Autonómica denunciamos que a Xunta de Galiza volve actuar de maneira unilateral, aprobando e anunciando o PLADIGA 2026 (Plan de prevención e defensa contra incendios forestais de Galiza), sen negociación previa e ignorando completamente á representación do persoal que traballa nos lumes.
Esta decisión prodúcese, ademais, tras un ano 2025 marcado polo conflito laboral, polas mobilizacións do persoal, polo incumprimento e a falla de vontade para a negociación e mellora dos Acordos que regulan as condicións de traballo e por unha campaña de incendios que puxo en evidencia graves carencias organizativas e de xestión.
Non podemos esquecer que a vaga de lumes de 2025 deixou ao descuberto un dispositivo tensado, con falta de medios, problemas de coordinación e decisións cuestionables que xeraron unha forte alarma social e arrasaron máis de 160.000 has. Lonxe de corrixir estas deficiencias desde o diálogo e a negociación, a Xunta opta agora por profundar no mesmo modelo: máis imposición e menos participación.
Unha vez máis, coñecemos pola prensa medidas que afectan directamente ás nosas condicións de traballo. A propia Xunta anunciou un incremento de brigadas -non din se para o SPIF, SEAGA ou seguir afondando nas externalizacións cos concellos-, novos medios e cambios organizativos coa aprobación do PLADIGA 2026 polo Consello da Xunta. É evidente que estamos ante modificacións reais da organización do traballo, das funcións e das relacións de postos de traballo.
Para nós é claro: o PLADIGA non é un documento técnico neutro. É un instrumento que altera condicións laborais e que debe ser negociado. O que está a facer a Xunta é evitar deliberadamente a negociación colectiva e baleirar de contido os espazos de representación do persoal. E xa temos antecedentes: nestes plans foi onde se crearon unidades operativas sen existir sequera nas relacións de postos de traballo extraendo persoal “a dedo” dos distritos (como coa UTA e UDEX).
Cómpre lembrar, ademais, que estamos ante un novo equipo á fronte da Consellería do Medio Rural, que lamentablemente comeza a súa etapa repetindo os erros do anterior. Agardamos que rectifiquen e reconduzan esta situación antes de que o conflito vaia a máis e que para vindeiras negocien antes de aprobar!
Por todo isto, desde a CIG-Autonómica esiximos:
- A apertura inmediata dun proceso real de negociación do PLADIGA 2026
- A entrega íntegra e urxente do documento
- A paralización da aplicación das medidas que afecten ao persoal mentres non sexan negociadas
- A convocatoria inmediata das mesas de negociación e das comisións de seguimento do persoal do SPIF, tanto laboral como funcionario
- Detalles
Coa Administración Xeral do Estado a piques de pechar a implantación das 35 horas, na Galiza seguimos nas 37,5 semanais. A Xunta tivo desde 2018 capacidade legal para reducir a xornada, pero nin o fixo nin o acordo de concertación de 2019 incorporou medidas reais.
Nós, o persoal da Xunta de Galiza, seguimos nas 37,5 semanais. Non é unha cuestión legal, é falta de vontade política.
Un marco que permitía avanzar, pero non obrigaba
O Acordo estatal de 2018 abría a posibilidade de que cada administración puidese establecer unha xornada inferior mediante negociación colectiva. Non era unha obriga nin unha medida automática: dependía da vontade de cada goberno.
Desde a CIG-Autonómica xa advertimos daquela que deixar esta cuestión aberta significaba que podía non aplicarse na práctica. E iso foi exactamente o que aconteceu na Galiza.
Facemos memoria: un acordo sen medidas reais en xornada
Posteriormente no Acordo de concertación de 2019, asinado pola Xunta con CCOO e UGT, non se recolleu a implantación das 35 horas. O texto limitábase a deixar aberta a posibilidade de negociar no futuro, comprometéndose unicamente a “estudar xornadas anuais inferiores para o persoal con xornadas a quendas, nocturnas ou especialmente penosas”.
Este acordo (descargar boletín informativo) integrou nun único marco distintas materias que viñan sendo obxecto de negociación: estabilización do emprego, carreira profesional, promoción interna, funcionarización e aspectos xerais das condicións de traballo.
Na práctica, o desenvolvemento posterior confirmou que non todas tiveron o mesmo peso. O acordo puxo o foco na carreira profesional e na funcionarización, mentres que outras cuestións, como a reducción da xornada ou a xubilación parcial, quedaron sen concreción.
Dende a CIG-Autonómica xa advertimos que aquel acordo non garantía melloras efectivas e que mesturar materias distintas nun único texto ía provocar que unhas acabasen impoñéndose sobre outras.
Defendemos entón, e seguimos defendendo hoxe, a necesidade de negociar a implantación XA das 35 horas, con posibilidade de maior redución atendendo á realidade das diferentes condicións de traballo.
As 35 horas son unha necesidade
A implantación das 35 horas non é unha cuestión simbólica, é unha necesidade real e supón unha vantaxe para a Administración:
- evitar prolongacións de xornada e desprazamentos en horario de tarde
- facilitar a conciliación da vida laboral e persoal
- mellorar a eficiencia e a calidade dos servizos públicos
- avanzar cara a unha distribución máis racional do tempo de traballo
- favorecer a igualdade, especialmente en sectores con maior carga de coidados
- mellorar a organización interna e a eficiencia dos servizos públicos
- contribuír á creación de emprego mediante unha mellor repartición do traballo
- aumentar a motivación e a calidade do servizo que prestamos á cidadanía
Unha reivindicación vixente
A experiencia tamén demostra que, sen presión e sen organización, non hai avances. Se algo se move, é porque hai quen o empurra. E que coa CIG-Autonómica levamos anos defendendo esta reivindicación, loitamos fronte á inacción da Xunta e fronte a acordos que non garanten dereitos.
Por iso esiximos de novo á Xunta que abra dunha vez unha negociación real para avanzar na implantación das 35 horas.
Porque despois de oito anos, a pregunta segue sendo a mesma:
Onde están as 35 horas na Xunta?
- Detalles
A Consellería de Política Social incumpre a Lei de prevención de riscos laborais. Na Axencia Galega de Servizos Sociais (AGASS), as traballadoras embarazadas das escolas infantís de cero a tres anos están sometidas a un risco biolóxico inaceptable.
As empresas e institucións con persoas empregadas a cargo teñen que protexer aos seu cadros de persoal ante os riscos derivados do traballo
Cando non existen no servizo postos exentos de risco para o embarazo, a empresa, neste caso a Consellería de Política Social, ten que apartar á traballadora do risco e dála en suspensión de contrato. Neste caso, quen se ten que facer cargo da prestación é a Mutua colaboradora da Seguridade Social, até o momento do parto.
Na sentenza (00264/2016, do Xulgado do Social nº 5, de Vigo), ratificada en Suplicación no Tribunal Superior de Xustiza de Galiza (TSXG), que estima a pretensión dunha traballadora embarazada a estar en suspensión de contrato e a cobrar a prestación por risco, estímase o risco biolóxico de contraer citomegalovirus ou parvovirus B-19, ou virus da labazada, susceptibles de dano fetal, poden darse en traballadoras en contacto íntimo con crianzas. É de todo punto imposible desvincular estes traballos de coidados a menores de tres anos sen contacto íntimo nos momentos de consolo e apego e nos de hixiene e alimentación.
Segundo as directrices para a avaliación de riscos e protección da maternidade no traballo impartidas polo Instituto Nacional de Seguridade e Hixiene no Traballo (INSHT), tratándose de citomegalovirus están contraindicadas as probas de detección precoz de anticorpos nas traballadoras embarazadas, sendo aconsellable limitar ao máximo o contacto con fluídos biolóxicos no embarazo no caso de seronegatividade mentres que no caso contrario non está garantida a protección fronte á reinfección ou reactivación da infección. Non existe vacinación, asociándose a infección do feto de consecuencias graves coa infección materna.
Tarefas como cambio de cueiros, dar de comer, consolar e calquera outra exposición a fluídos expón ao contaxio á traballadora embarazada.
No caso do virus da labazada (parvovirus B-19), cuxa transmisión é por vía respiratoria, a infección fetal é máis agresiva durante os dous primeiros trimestres do embarazo.
O Consorcio Galego de Servizos de Igualdade e Benestar, tras esta sentenza e en cumprimento da normativa en prevención de riscos laborais que o obriga a protexer a seguridade e a saúde do seu persoal, mantén ás traballadoras embarazadas en suspensión de contrato dende o momento en que comunican o seu estado de gravidez, realizando os trámites coa Mutua afastada do risco e recibindo de xeito telemático a información referente á súa situación (protocolo de embarazo, pasos a dar para a solicitude da prestación, etc.).
Tamén, no caso das embarazadas que forman parte das listas de contratación se aplica o mesmo protocolo de actuación, aceptando o nomeamento de substitución e quedando en suspensión por risco ao cargo da Mutua colaboradora da Seguridade Social no momento de comunicalo.
Outro xeito de actuar por parte da Administración, dende este sindicato, considerámolo unha discriminación intolerable por razón de sexo e maternidade.
Esiximos que adopten as medidas cautelares precisas para protexer a saúde das traballadoras embarazadas e que estas medidas non comporten discriminacións directas e/ou indirectas por razón de sexo.
Segundo as evidencias científicas o embarazo é cousa de mulleres. Onde están estas medidas no Plan de Igualdade?
- Detalles
A CIG interpuxo no Tribunal Superior de Xustiza de Galiza (TSXG) un conflito colectivo en desconformidade coa interpretación que o Consorcio dá á cláusula do Acordo de Integración e coa práctica do Consorcio Galego de Servizos de Igualdade e Benestar consistente en impor, aos/ás traballadores/as coa categoría de PSX de determinados centros de día, vivendas comunitarias e escolas infantís, a obriga habitual (non puntual nen excepcional) de realizar a limpeza dos seus propios centros de traballo, por non dispor de servizo específico de limpeza ou, dispondo dese servizo, por non ser suficiente para atender á dita tarefa.
En novembro de 2023 a Sala do Social do TSXG rexeitou a demanda, sen entrar no fondo do asunto, argumentando que non era obxecto de conflito colectivo, polo que quen quixera reclamar tería que facelo individualmente. Diante deste pronunciamento, en xaneiro do 2024, presentamos recurso de casación perante a Sala do Social do Tribunal Supremo, a impugnar a sentenza da Sala do Social do TSXG por varios motivos, entre outros, por achar que estabamos diante dun conflito colectivo e, por tanto, o procedemento era o axeitado. O 10 de setembro do 2025, a Sala do Social do Tribunal Supremo ditou sentenza, no recurso de casación, pola que anulou a sentenza do Tribunal Superior de Xustiza de Galiza, ao entender que o conflito era colectivo e que, por tanto, a Sala do Social tiña de entrar no fondo do asunto e ditar nova sentenza.
Agora, a Sala do Social do TSXG, entra no fondo da cuestión e declarou non conforme co dereito a práctica do Consorcio Galego de Servizos de Igualdade e Benestar de impor ao Persoal de Servizos Xerais (PSX) a obriga de realizar, con carácter habitual, a limpeza de certos centros de traballo
Asemade, o TSXG condenou ao Consorcio a cesar esa práctica, polo que, no caso de non cesala nalgún centro de Galiza, poderiamos executar a sentenza e forzar ese cesamento.
O Consorcio Galego pode presentar recurso de casación contra a sentenza.
Costou anos de inxustiza e abuso, pero aí está !!!!
A CIG, sempre denunciando contra os abusos das xerencias do Consorcio e polos dereitos das/os traballadoras/es !!
- Detalles
Preto de 5.000 traballadores e traballadoras de Administración e Servizos dos centros de ensino carecen dunha regulación actualizada das súas condicións laborais
A CIG mobilizouse o martes 17 de marzo diante da Consellería de Educación para reclamar a apertura dunha mesa de negociación que permita aprobar un acordo de condicións de traballo para o persoal de Administración e Servizos dos centros educativos da Xunta de Galiza. Aproveitando a concentración ás portas do complexo de San Caetano, os delegados e delegadas da CIG fixeron entrega no rexistro central de máis dun milleiro de sinaturas recollidas entre o persoal afectado, dirixidas á Consellería, nas que se reclama a regulación das súas funcións e dos seus dereitos laborais.
Así mesmo, tras entregar as sinaturas, representantes da central sindical mantiveron un encontro co subdirector xeral de Recursos Humanos -xa que o director xeral non estaba no edificio- a quen se lle trasladou de primeira man a necesidade de convocar xa a mesa para iniciar a negociación dun acordo, advertíndolle que as mobilizacións continuarán mentres non se atendan as lexítimas e xustas demandas deste colectivo.
Na actualidade 4.945 empregados e empregadas públicas dos centros educativos carecen dunha regulación actualizada das súas condicións laborais. Destas persoas, máis de 3.000 quedaron no ano 2024 sen regulación específica tras o proceso de funcionarización, ao quedar excluídos do V Convenio Colectivo Único ao mudar de réxime xurídico. A isto súmase que o acordo que regula o resto do persoal funcionario dos centros (subalterno e persoal administrativo) está completamente obsoleto e non se adapta á nova realidade dos centros.
Este persoal ten unhas condicións absolutamente indignas, sen garantías xurídicas dos seus dereitos, cunhas diferenzas enormes dentro do propio colectivo en canto ás funcións e horarios, cunhas rateos que están desfasadas e que a Consellaría non cumpre, pois nin sequera se substitúen as ausencias.
O pasado 10 de outubro, e tras varias mobilizacións, houbo unha reunión con Educación, na que a Administración solicitou tempo para estudar as demandas e “prometeunos chegar a un acordo que abordase a diversidade de categorías profesionais existentes”. Porén, a día de hoxe, a Consellería continúa calada, sen convocar unha mesa de negociación nin ofrecer avances de ningún tipo.
Problema derivado unha funcionarización “chapuceira”
Este colectivo é persoal empregado público que ten que ter unhas condicións dignas de traballo. Porén, a Consellaría perpetúa o trato discriminatorio e as vulneracións de dereitos, con permisos que en ocasións son denegados automaticamente simplemente polo feito de traballar nun centro educativo, así como rateos de traballo abusivas e obsoletas -que levan máis de 30 anos sen revisarse- e unha falta de delimitación clara das funcións de cada grupo profesional que traballa nos centros educativos.
Reclamamos tamén unha reorganización das escalas que permita corrixir os problemas derivados do proceso “de funcionarización á baixa” realizado de forma chapuceira pola Xunta, CCOO e UGT con pactos previos e sen negociación real. Cómpre garantir o correcto encadre das categorías nos grupos ou subgrupos que lles corresponden segundo a titulación requirida, xa que na maioría dos casos foron rebaixados e desprofesionalizados.
O caos laboral é importante, pois persoal da mesma categoría profesional realiza unhas funcións ou outras dependendo do centro educativo no que traballe e, incluso, as súas tarefas varían se muda a equipa directiva do centro.
Outras Consellarías xa negociaron acordos
Durante a concentración salientouse que hai outras consellerías que xa negociaron acordos de condicións laborais, como o persoal dos centros de Política Social e o que traballa nos incendios forestais, pero a Xunta está claramente a ningunear ao persoal dos centros de ensino. A pesar de ser preto de 5.000 compañeiras e compañeiros, apenas hai 4 ou 5 en cada centro, polo que están nunha situación de illamento que ademais de limitar a efectividade e capacidade de protesta, tamén fai que sexan máis susceptíbeis de sufrir abusos.
Xa temos advertido de que existen centros educativos nos que se están a producir situacións de abuso laboral, coaccións ou tratos discriminatorios cara ao persoal non docente, polo que non descartamos trasladar futuras accións sindicais tamén ás portas destes centros e se isto non se lle da solución acudiremos aos tribunais.
A CIG-Autonómica reitera que uns servizos públicos de calidade pasan necesariamente por garantir condicións laborais dignas para quen os presta, e anuncia que continuará coas mobilizacións ata que a Consellería de Educación abra unha mesa de negociación para aprobar un acordo de condicións laborais para o persoal non docente.
- Detalles
O 17.03.2026 a CIG e as demais organizacións sindicais asinantes do acordo polo que se establece o réxime de prestación de servizos do persoal que desenvolve a súa actividade laboral no territorio dos arquipélagos do Parque Nacional Illas Atlánticas de Galiza, rexistramos unha solicitude dirixida á D.X. de Emprego Público e Administración de Persoal, para a constitución da Comisión de Seguimento do devandito acordo e a convocatoria da primeira xuntanza o máis axiña posible.
Nestes meses dende a sinatura do acordo o 25 de xuño de 2025, a CIG recibiu información de importantes e reiterados incumprimentos en relación ao establecido no acordo para o réxime de prestación de servizos e irregularidades na concesión de indemnizacións por razón de servizo.
Por todo isto e porque o propio acordo dispón que a Comisión de Seguimento constituirase aos seis meses da sinatura e reunirase de forma ordinaria unha vez cada ano natural, exiximos a inmediata constitución da Comisión de Seguimento e a convocatoria da primeira xuntanza para tratar estes e outros asuntos relacionados e evitar a volta atrás hacia un concepto feudal na xestión do único Parque Nacional da Galiza.