No desenvolvemento do último comité de seguridade e saúde da consellería de Medio Rural (área de Medio Rural) celebrado o 6 de abril, analizáronse distintos temas e tomáronse diversos acordos de interese para o persoal que traballa nesta consellería. A continuación detállanse os distintos asuntos que se trataron:
1.- Revisáronse os informes de sinistrabilidade e accidentes correspondentes aos anos 2014 e 2015. Solicitamos un maior grao de detalle dos datos.
2.- Informouse sobre as avaliacións dos centros de traballo realizadas en 2015 e comunicadas aos repectivos centros. Podedes solicitar a avaliación do voso centro e posto de traballo (no caso de existir) ao responsable do centro ou a calquera dos delegados de prevención.
3.- Vanse revisar os protocolos de vixiancia da saúde que se realiza ao persoal de Medio Rural, especialmente ao persoal vinculado ás labores de extinción de incendios. Esta revisión demandada pola CIG pretende acomodar a concordancia da vixiancia da saúde coas funcións que se desempeña e incorporar os antecedentes médicos de cada persoa (este último elemento é unha das advertencias feitas pola inspección de traballo no accidente mortal de Quique Casanova).
4.- A CIG presentou un informe técnico sobre a avaliación de riscos relativos aos traballos de campo desenvolvidos polo persoal laboral veterinario da consellería de Medio Rural. O comité acordou trasladarllo ao servizo de prevención para que o incorpore ás avaliacións que se fagan especificamente destes postos no segundo semestre do ano (para consultar o informe íntegro, podes pulsar aquí para descarregalo).
5.- Acordouse formar un grupo de traballo para revisar o estado das taquillas nos distintos centros de traballo da consellería do Medio Rural, establecer os criterios de priorización para a súa cobertura e definir o modelo de taquilla.
6.- Desde a CIG solicitouse o subministro de roupa de abrigo para o persoal de incendios ao levar máis de oito anos sen facer ningunha reposición. Neste punto acordouse trasladar esta petición ao grupo de traballo de roupa do comité de extinción de incendios. Ao mesmo tempo traballarase de forma paralela coa orde de uniformidade de axentes facultativos medioambientais para que os contratos de subministro desta roupa contemplen as indicacións que estableza a orde de uniformidade.
7.- Nun dos últimos puntos, tratáronse distincas cuestións vinculadas aos vehículos. Ante o estado do parque móbil, desde a CIG solicitouse unha avaliación individualizada dos vehículos e acordouse que a consellería trasladaría un informe do parque móbil co seguinte detalle para cada vehículo: ano de matriculación, km, nº de averías e coste acumulado, destino e tipo (propio ou alugado). Solicitouse tamén a incorporación de prioritarios nos vehículos de axentes e técnicos que traballan en incendios forestais. Neste punto indicousenos que non había ningunha norma obrigatoria ao respecto e desde a CIG matizouse que son elementos preventivos no ámbito de emerxencias e que se deberían incorporar cando menos nas novas contratacións. Finalmente solicitamos un protocolo específico de limpeza e desinfección dos vehículos de traballo, especialmente os vinculados ao persoal veterinario polos riscos biolóxicos.
8.- No punto de rogos e preguntas, informouse que non se podían facer cursos de aplicador/manipulador específicos para o persoal da consellería por problemas co financiamento do PDR. Indicouse que o distrito de Lugo se trasladaría para a nova ubicación no prazo dun mes e facilitouse información sobre os casos de dous traballadores que se revisaran no comité de outubro de 2015.
