Nun novo capítulo na continua campaña de agresións contra os empregados públicos desde as elites políticas e financeiras, neste caso o Partido Popular vén de aprobar na Comunidade Autónoma de Murcia, en pleno Nadal, a Lei do Parlamento de Murcia 5/2010, de 27 de decembro, de medidas extraordinarias para a sustentabilidade das finanzas públicas (BORM do 31 de decembro).

As medidas aprobadas en Murcia constitúen unha agresión sen precedentes en tanto que, para alén de recortes de índole económica a maiores da redución salarial imposta en xuño de 2010 a nivel de todo o Estado, inclúen medidas que desregulan e precarizan as condicións laborais dos empregados públicos desa comunidade autónoma:

• Modificación unilateral da normativa sobre horarios de traballo na Administración. Incremento da xornada semanal, que pasa de 35 horas a 37,5 horas semanais (40 horas con dedicación exclusiva); desregulación do horario de traballo, ao contemplarse que os responsables dos servizos poidan modificar os horarios de apertura.
  

• Está prevista a supresión dunha inxente cantidade de postos de traballo ocupados por persoal interino como consecuencia do alargamento do horario de traballo do persoal fixo. O persoal fixo pasará asumir o incremento de carga de traballo, cunha maior xornada semanal e menores retribucións.
  

• Os cursos de formación en horario de mañá non contarán como tempo de traballo efectivo, debendo os traballadores recuperalos fóra da xornada.  Os permisos pasan a computarse por días naturais en lugar de por días hábiles.

• As retribucións do persoal en caso de baixa por incapacidade temporal serán só do 75% das retribucións mensuais ordinarias, agás no caso de accidente de traballo ou enfermidade laboral

• Contémplase a posibilidade de traslados forzosos e continuos do persoal entre distintos departamentos e organismos sen ningún límite xeográfico, temporal ou funcional.

• As horas extras non serán compensadas economicamente, senón con 15 minutos adicionais de descanso por cada hora traballada fóra da xornada de traballo.

• Suspensión do acordo para a homologación entre o persoal da Administración xeral de Murcia e o Servizo Murciano de Saúde. O persoal de Administración xeral de Murcia deixará de percibir o 30% que restaba dese complemento.

• Drástica redución dos conceptos obxecto de axuda no Fondo de Acción Social de Murcia.

• Limitación de dereitos sindicais dos empregados públicos de Murcia: suspensión unilateral de todos os acordos nesta materia, e redución dos dereitos en materia sindical ao mínimo recollido na Lei orgánica de liberdade sindical, Lei de prevención de riscos laborais, Estatuto dos traballadores e Estatuto básico do empregado público.

• Supresión da Oferta de Emprego Público para Murcia.

Alén destas medidas que afectan ao persoal laboral e funcionario da Administración xeral da Comunidade Autónoma de Murcia, a referida Lei 5/2010 inclúe medidas extensivas para o persoal docente e do Servizo Murciano de Saúde, tanto en materia retributiva, coa eliminación do complemento de produtividade e a redución nun 10% dos complementos de garda e turnicidade, como en cuestión de xornada e horarios de traballo.

Desde o Goberno autonómico, o Partido Popular de Murcia repite a consabida consigna de que a precarización das condicións laborais dos empregados públicos son a única saída da crise económica que atinxe as finanzas desa comunidade autonómica. Así, culpabilízase da crise a traballadores e traballadoras que sobreviven en boa parte con salarios mileuristas e inframileuristas, mentres se manteñen e reforzan as mesmas políticas económicas favorecedoras da especulación en interese das elites financeiras e que están a liquidar o tecido produtivo.

Desde a CIG-Autonómica, manifestamos o noso máis contundente rexeitamento pola agresión contra as empregadas e empregados públicos de Murcia e expresamos a nosa solidariedade coas accións de protesta que están a desenvolver contra a aplicación da nova lei, con varias manifestacións ante o Goberno e o Parlamento de Murcia secundadas por varios millares de traballadores e traballadoras da Administración murciana; así mesmo, desde a CIG-Autonómica facemos un chamamento a todos os traballadores e traballadoras da Xunta para que secunden a folga xeral convocada pola CIG o próximo xoves 27 de xaneiro, contra as políticas que están a impoñer un retroceso social e laboral descoñecido desde a posguerra.

Para descargar a Lei 5/2010 de medidas extraordinarias de Murcia, premer aquí.