Dentro dos subgrupos que quedan por elixir, varios traballadores comunicáronos o seu enorme malestar porque andan circulando por vías non oficiais os listados das prazas que, supostamente, se van ofertar proximamente aos subgrupos C2 e C1.

Desde a CIG-Autonómica solicitámoslle á Función Pública que para garantir a transparencia sobre estes asuntos, unha vez se elaboren os listados provisionais, se lle de publicidade desde a páxina web de Función Pública e se comunique esta ás organizacións sindicais para poder presentar as alegacións oportunas. Subsidiariamente, co gallo de facilitar o acto de elección de destino ás persoas implicadas, que se faga publico ese listado, canto menos, no momento de envío o DOG.

Por outra banda, mediante escrito presentado con data do 02/03/2011, xa expuxemos a nosa queixa pola oferta ao subgrupo A2 de prazas quedaron vacantes tras o proceso de resultas do vixente concurso de traslados. Do mesmo xeito, propuxemos unha solución para conciliar os dereitos tanto do persoal funcionario como o de novo ingreso.

De novo insistimos nos nosos argumentos, para que se teña en consideración os fundamentos e alternativas expostas, para os efectos de non seguir ofertando de xeito definitivo ao resto de subgrupos as prazas que aínda non pasaron de xeito efectivo por un concurso de traslados.

Un día despois o director xeral da Función Pública contéstanos, desbotando a dita solución da toma provisional porque "xera disfuncións" sen citar ningún exemplo concreto. Desde esta central se citou a puntuación da permanencia nos concursos de traslados como a única das disfuncións, para a cal se propuxo como solución a de excepcionalo nas vindeiras ordes de concurso de traslado. Para maior abundamento, cita a discriminación fronte aos aspirantes que tomen destino definitivo, deixando de lado a enorme discriminación que supón fronte ao actual persoal funcionario.