O martes 31 de maio tivemos a primeira xuntanza con Función Pública para discutirmos as bases das convocatorias dos subgrupos A1, A2 e C2 de corpos xerais-libre da oferta de emprego do 2009 (xa era hora!!). Inda que as bases non están pechadas, hai unha novidade a salientar para calquer persoa candidata ao corpo C2, referente á proba de informática: en troques da versión inicial de Microsoft Office XP, vai ser con Microsoft Office 2007.

No anterior proceso de C2, a CIG aceptou a utilización do software da empresa privada Microsoft por non perxudicar a quenes levasen tempo coa súa preparación, ao tempo que demandábamos de Función Pública un anuncio de que as vindeiras serían con software libre (OpenOffice), cousa que non aceptou o Director Xeral. Nesta ocasión a CIG reclamou novamente a utilización de software libre, por diversos motivos:

• A utilización de software propietario obriga ás persoas candidatas a apañar unha copia pirata ou a facer un alto desenvolso económico se queren ser legais.
• O cumprimento do acordo unánime do Parlamento de Galiza do ano 2007 que compromete ao executivo ao uso de software libre na Administración.
• O cumprimento do programa eleitoral do PP, quenes ofrecían aos cidadáns a súa intención de extender o software libre na Administración.

Novamente nos vimos ante o conflicto de termos que defender o cambio de software no proceso selectivo ou non dicir nada para non perxudicar aos milleiros de persoas candidatas a un posto de auxiliar adminstravo. E novamente alegamos que aceptariamos o software propietario de Microsoft acompañado dunha declacion do Director Xeral de Función Pública anunciando o cambio futuro.

Porén, foi a propia Función Pública quen decidiu realizar un cambio: parece ser que a Secretaría Xeral de Modernización indicou que a partires de agora será Microsoft Office 2007 a versión ofimática de uso común na nosa Administración. Xa que logo, e sabedores de que o paso de XP a 2007 supón numerosos cambios:

• Criticamos o cambio de versión a estas alturas (oferta do 2009).
• Postos a cambiar, reclamamos que pasen a OpenOffice.
• O mantemento do software propietario de Microsoft supón un incumprimento dos acordos Parlamentares e do programa de goberno do PP.
• Inda non pechado o asunto, advertimos aos candidatos/as que con toda probabilidade será a versión 2007a que terán que preparar.

Para rematar, denunciamos as poucas luces ou os intereses espureos que poidan existir nesta materia. O PP non acaba de entender que o software libre é perfectamente útil, que a súa utilización suporía unha reducción importante de gasto público, ao tempo que suporía que cunha pequena parte do diñeiro das licenzas axudariamos a reducir o paro (contratación de informáticos) e a incrementar as posibilidades dun tecido empresarial de alta productividade (empresas de soporte técnico propias).

Referente ao resto das bases (dispoñíbeis na zona de descargas deste web), os cambios son poucos e todos eles inda abertos:

• Aceptan eliminar a lectura pública nos supostos prácticos (A1, A2). A CIG reclama probas obxectivas, sen lectura en ningunha proba e, caso de manter o desenvolvemento de tema e suposto práctico escrito, que o test teña mais peso.
• A reducción de temas é de unha importancia cativa, e inda non pechada. Insistimos especialmente en A2.
  
• Aumentan un pouco o tempo dos test nos tres grupos.
• Incrementan unha praza para discapacitado/a en A1.
• Manteñen a oposición como forma de acceso.
• Aceptan a nosa petición de modificar a redacción do requisito de titulación en A2, para adaptalo á normativa que permite presentarse con tres cursos de licenciatura. Non aceptan mudar a redacción para engadir a formación profesional de terceiro grao ou equivalente.
• Manteñen a exención da proba de galego. Irónicamente pedimos a exención das preguntas de dereito ás persoas con licenciatura en dereito (como xa teñen o título, xa acreditan o coñecemento).
• Non aceptan introducir nota de corte nas bases.
• Non aceptan modificar a composición dos tribunais.
• A EGAP vai elaborar uns temarios guía para A1 e A2 (para C2 son disposicións normativas)
• Non aceptan suprimir o temario de informática para C2 (alegamos que ao teren proba práctica, xa demostran o coñecemento das ferramentas)
  
• Introducen o 1 de decembro do 2011 como data de referencia para o primeiro exercicio.

Descoñecemos se nos van chamar a unha nova xuntanza ou se as modificacións que incorporen as levarán directamente á Mesa Xeral. En todo caso, contamos que antes dun mes estea publicado no DOG.

Documentos relacionados:

• Alegacións CIG
  
• Bases da convocatoria A1 ( borrador do 31-05-2011)
  
• Bases da convocatoria A2 ( borrador do 31-05-2011)
  
• Bases da convocatoria C2 ( borrador do 31-05-2011)