Mobilizarase nas 7 cidades, Cangas, Cee, Vilagarcía, A Estrada, As Pontes, Ribeira, Burela e Verín
A CIG mobilizarase este Primeiro de Maio en 15 cidades e vilas de Galiza baixo o lema “Paremos o saqueo! Emprego, salarios e pensións dignas”. Rexeitamos as políticas económicas dos gobernos galego e español, incapaces de enfrontar a grave carestía da vida nin frear o aumento das desigualdades e da pobreza e chamamos a mobilizarse en defensa dos servizos públicos, da recuperación económica, a industrialización e a creación de emprego digno na nosa terra.
A espiral xeneralizada da suba dos prezos e da inflación, nomeadamente de bens e produtos básicos de consumo, está a causar unha importante deterioración nas condicións de vida da clase traballadora e da maioría do pobo galego. Nesa liña, cuestionamos abertamente que en Galiza haxa estes altos prezos nos alimentos cando somos produtores dos principais produtos da cesta da compra, como leite, carne ou peixe.
Fronte a esta situación de inflación desbocada, a lesiva reforma das pensións e a reforma laboral, a CIG chama á mobilización ante a patronal e ante os gobernos e a dar resposta a unha realidade económica e social extrema, por moito que a disfracen con propaganda e por moito que a encubran no diálogo social, con CCOO e UGT. Diálogo social que se converteu nunha auténtica fosa común onde se enterran os dereitos laborais e sociais do conxunto da clase traballadora.
Mobilizacións do PRIMEIRO DE MAIO
Na CIG facemos unha chamada a saír á rúa o vindeiro luns nas mobilizacións convocadas en cidades e vilas de toda Galiza, salientando que a central será, como en anos anteriores, a de Vigo.
