Nestes momentos, mentres estamos aquí concentrados os empregados e empregadas públicas, o Consello da Xunta está aprobando un anteproxecto de lei que supón un recorte inaceptable dos nosos dereitos.
Hoxe estamos aquí, no mesmo sitio que hai unha semana, onte estabamos na EGAP igual ca o venres pasado, a semana que vén percorreremos as rúas de Compostela e do resto de cidades de Galicia.
A Comisión de Persoal de onte foi unha burla. Unha indecente modificación con respecto á Incapacidade Temporal non é suficiente. Queremos todos e cada un dos nosos dereitos laborais, sexan respectados, a maioría das medidas que se queren aprobar son fume, non son un aforro real.
As catro organizacións sindicais, o pasado día 10 de febreiro, puxeron enriba da mesa medidas de aforro real que a Xunta, de momento, non ten en conta. Entre outras: redución das Asistencias Técnicas, redución do persoal de gabinete, redución das contías de gastos protocolarios, que as dietas e axudas de custo sexan iguais para todos/as os traballadores/as incluídos os altos cargos, implantación do software libre e redución dos gastos en publicidade institucional.
Todas estas medidas son propostas de como se debe de aforrar. Si que estamos presentando alternativas. Como parece que a Xunta non se entera, convidamos aos compañeiros e compañeiras a que presenten un escrito de apoio á alternativa xurdida das asembleas da semana pasada e elaborado pola Xunta de Persoal e o Comité de Empresa de Servizos Centrais, para que se trate nas mesas de negociación establecidas no Estatuto Básico do Empregado Público. Dende hoxe poñemos a vosa disposición este escrito de apoio, para presentar polo rexistro.
Perante este ataque, a resposta das traballadoras e traballadores públicos é clara: Non ao Anteproxecto de Lei de Medidas no Emprego Público.
Aquí estamos, e neste camiño imos seguir, até que a Xunta rectifique, até que a Xunta deixe de insultarnos, até que se respecten os nosos dereitos.
Somos a primeira liña na defensa dos Servizos Públicos e por iso, facemos un chamamento a toda a cidadanía para que sexa consciente de que este ataque non é un ataque só contra as empregadas e os empregados públicos, é un ataque contra os Servizos Públicos e o Estado do Benestar.
A TODOS E TODAS, MOITAS GRAZAS. XUNTOS PODEMOS
Nota remitida aos medios
