Mentres os recortes contra os servizos públicos, e os propios empregados públicos que os facemos posibles, seguen avanzando.
No DOG 08/03/2012 sae publicado un anuncio a contratación de servizos para o desenvolvemento de campañas publicitarias sobre a promoción das iniciativas da Xunta de Galicia en materia de identidade, galeguidade e datas de especial sensibilidade social.
Estes 1,2 millóns de euros podería ser un dos 80 que Feijoo di que ten que aforrar para manter os servizos públicos esenciais, sen necesidade de ter que recortarnos dereitos sociais e laborais ás empregadas e empregados públicos. Cantos traballadores públicos, por exemplo, temos que poñernos de baixa para xuntar os 1.200.000 € que a Xunta vai dilapidar en darlle publicidade ao seguinte?:
-
Identidade da Xunta: que pasa, que a xente non sabe o que é a Xunta e hai que andala identificando?
-
Galeguidade: a galeguidade demostrase doutro xeito señor Feijoo, non atacando o idioma galego, non retirándolle as subvencións aos medios que utilizan o galego, enxalzando figuras galeguistas, como Rosalía de Castro, e non negándose, como hai ben pouco, a establecer un día no ensino para lembrar a súa figura.
-
Datas de especial sensibilidade social: isto xa é a contradición máxima. Que fale de sensibilidade social un goberno que privatiza os servizos públicos dos que as empresas amigas poidan sacar rendemento e suprime aqueles "deficitarios", que cerra comedores escolares, que reduce servizos de ambulancias, que reduce as retribucións durante as baixas dos traballadores enfermos, que suprime quirófanos e camas hospitalarias, etc. etc. Agora pretende dar a coñecer que ten sensibilidade social; en realidade o que vai publicitar é que ten sensibilidade social con certas datas, non coas persoas humanas pois coas persoas xa vemos que non a ten.
Podemos intuír tamén, polo sucesivo goteo de convenios e subvencións publicados no DOG, a que medios de comunicación vai ir a parar este contrato.
Nota remitida aos medios
NON Á AUSTERIDADE HIPÓCRITA!
NO AO SECUESTRO DOS NOSOS DEREITOS PARA PAGAR GASTOS INÚTILES!
