O luns, 25 de xuño, tivo lugar unha xuntanza coa Consellaría de Medio Rural e do Mar para tratar a proposta de modificación de RPT da consellaría con motivo dos reforzos de verán do PLADIGA. Convocada Mesa Xeral Extraorinaria Empregados Públicos.

Á petición das organizacións sindicais, a consellaría fai unha pequenísima explicación da proposta de creación de 436 postos en varias categorias do SPDCIF e onde se nos vende coma un logro o que acabaron de conquerir: que Orzamentos lles deixe crear esa cantidade de postos para engadir na RPT.

Desde a CIG-Autonómica facemos as seguintes consideracións:

• Lembramos que a finais do ano pasado xa nos ían convocar para falar de varios temas e para recoller as opinións das organizacións sindicais, sendo hoxe a primeira xuntanza, seis meses despois.

• Pedimos que se nos explique a creación destes 436 postos, si é pola existencia de sentencias de indefinición ou por outros motivos.

• Solicitamos a creación de tantos postos de traballo coma sexa necesario para un correcto mantemento do dispositivo público contra incendios.

• Pedimos que todas as contratacións sexan polo decreto de listas vixente e a eliminación de Seaga, polo que o número de contratacións pola empresa pasen ao operativo público (SPDCIF).

• Preguntamos por qué as 436 prazas se crean só por tres meses así como por qué o SPDCIF se enfoca na extinción en detrimento da prevención, que é como entendemos nós o servizo público.

• Entendemos que non se vai a contratar a máis traballadores.

• Diminuíuse o persoal un 41% con respecto ao ano pasado. Consideramos que o persoal será escaso para a campaña, aínda que logo saia á prensa a mesma conselleira dicindo que os medios son os mesmos que en anos anteriores.

• Os números da memoria non son reais: hai unha morea de vacantes (+/- 15%) e baixas (+/- 7%); en total preto de 300 postos.

• Solicitamos a cobertura inminente de todas esas prazas. A consellaría di que se está iniciando a cobertura de vacantes por Ourense (4 prazas de axentes); todo o farán en base ás necesidades que lles transmitan os distritos e as delegacións provinciais.

• Solicitamos que as 436 prazas sexan creadas coas denominacións do acordo.

• Preguntamos por qué desaparecen os mecánicos de Lugo.

• O Pladiga contradícese coa memoria económica e funcional e demostrámosllo dando datos por provincias. Preguntamos por qué esa diminución nas contratacións.

A consellaría di que ao máximo onde poden chegar é á contratación desas 436 prazas vía RPT. Das 302 prazas restantes ata o que di o Pladiga non saben si se van a contratar ou non, nin saben que criterios aplicar para facer esas posibles contratacións. Insisten en que é un logro poder meter en RPT esas 436 prazas.

Quedamos para o vindeiro mércores para tratar as alegacións que se presentarán polas organizacións sindicais.

Comprobamos que se dan por satisfeitos dende Medio Rural e do Mar coa inclusión de 436 postos en RPT e non lles quita o sono o que poida vir en plena campaña do verán, ou mesmo unha vez que remate ésta, e que aconteza o do ano 2011 cando ardeu no mes de outubro o Macizo Central Ourensán por non dispór de medios suficientes. Non teñen moi claro como van xestionar a posibilidade de que fixera falta máis medios humanos.

Descargar o documento de alegacións