Novas por contido

A Xunta de Persoal dos Servizos Centrais denuncia o "privilexio anacrónico" do presidente da Xunta de ter unha porta exclusiva para entrar e saír do edificio administrativo de San Caetano unha vez por semana. A dita exclusividade bloquea de xeito permanente 34 prazas de aparcamento gratuitas para o persoal da Xunta, para a veciñanza da zona e, en xeral, para toda a cidadanía que teña que acudir a San Caetano.

No 2012 a Xunta de Persoal solicitara xa que se desbloqueasen o total das prazas de aparcamento do frontal do edificio administrativo de San Caetano (lateral da consellaría de Fancenda). A razón está motivada pola perda de prazas tralas obras dunha rotonda próxima aínda que a problemática de aparcamento na zona sempre estivo presente.

A Xunta respondeu que por motivos de seguridade non podía desbloquealas aínda que ao final conseguiuse que se desbloqueara as prazas máis alonxadas do edificio. Seguiron mantendo a prohibición de aparcar na outra metade motivada por razóns de seguridade. Expúxose como xustificación o uso que fai o presidente da Xunta da porta principal do edificio de Presidencia e tería que facer o percorrido flanqueado por ambos os dous lados por coches estacionados. Hai que ter en conta que a única persoa que accede en coche pola porta grande da consellaría de Presidencia é o presidente da Xunta e que ademais só o fai unha vez por semana cando hai Consello. Ademais do coche presidencial, únese á comitiva outro coche oficial de alta gama e máis un coche da policía autonómica.

A Xunta de Persoal sinala que os problemas de seguridade non existirían se o presidente da Xunta utilizase calquera dos dous accesos controlados que existen no edificio administrativo de San Caetano. Semella que a entrada do presidente por unha porta que se abre exclusivamente para el obedece a un certo privilexio que resulta anacrónico. Por unha banda, polo propio feito en si, xa que hai dúas portas de acceso cunha vixilancia permanente da Policía e da seguridade privada do edificio e, por outra, porque este feito ten consecuencias sobre as facilidades de aparcamento, non só do colectivo traballador, senón tamén da cidadanía que acode diariamente ao edificio administrativo de San Caetano.

Polo exposto, solicítanlle ao presidente que cando acceda coa súa comitiva de coches oficiais ao recinto de San Caetano o faga como o resto, mesmo as súas conselleiras e conselleiros, por calquera das dúas portas que están destinadas para este fin no edificio administrativo. En consecuencia, solicitan tamén que se fagan as xestións oportunas co Concello de Compostela para permitir o aparcamento na totalidade da franxa que vai dende o frontal do edificio de Facenda até o edificio da Presidencia.

 

En verde as prazas de aparacamento liberadas tralas xestións da Xunta de Persoal. En vermello as prazas de aparcamento aínda bloquedas polo uso da porta de Presidencia para entradas e saídas puntuais do presidente da Xunta.

Outras novas recentes

Venres, 22 Agosto 2025

Máis de 45.000 persoas bótanse á rúa en toda Galiza contra a política forestal do PP e en solidariedade coas persoas afectadas pola vaga ...

A CIG reclama medidas inmediatas para recuperar os bens e paliar as consecuencias, e un servizo público único, de xestión directa e dependente da Xunta de Galiza, para traballar na prevención e respostar ás multiemerxencias do medio natural e rural durante  todo o ano. Un total de 29 localidades de todo o país acolleron o 21 de agosto mobilizacións multitudinarias...
Martes, 19 Agosto 2025

A CIG critica a caótica xestión do Goberno galego en materia de persoal de incendios

Alertamos de que se están a facer chamamentos en plena vaga de lumes sen tempo para formar en prevención. Dende a CIG-Autonómica denuncia a caótica xestión da Xunta de Galiza en materia de persoal do Servizo de Prevención e Defensa contra Incendios Forestais (SPIF), até o punto de que a día de hoxe aínda non se coñecen nin as vacantes que están por cubrir. Temos datos de...
Mércores, 20 Agosto 2025

‘Por un Monte Galego con Futuro’ convoca protestas contra a política forestal do PP “que queima os montes e as casas”

A CIG fai un chamamento a participar nas 26 concentracións que terán lugar en cidades e vilas de todo o país este xoves 21 a partir das 20:00h A plataforma ‘Por un monte Galego con Futuro’ convoca mobilizacións para denunciar que a actual vaga de incendios que está a padecer Galiza é consecuencia directa da política forestal do PP, unha política forestal que, tal e como...