O mércores 11 de novembro os sindicatos sentámonos coa Administración na Mesa Xeral e Comisión de Persoal, onde tratamos diversos asuntos (RPT Vicepresidencia, RPT Presidencia, RPT Cultura, modificación dos programas que rexen nos procesos selectivos de corpos xerais por libre e promoción interna, e asuntos de interese en rogos e preguntas).
Relacións de postos de traballo
Das relacións de postos de traballo (RPT), destaca a de Vicepresidencia. Recoñecemos que houbo negociación real, con cambios respecto da proposta inicial. Finalmente a CIG non apoiou a proposta da consellería porque amortizan de 9 postos de traballo, todos de niveis baixos, destacando a eliminación de catro postos de limpador/a que vai dar lugar necesariamente á entrada dunha empresa privada. CIG, CCOO e UGT votamos en contra. CSIF votou a favor.
En canto á RPT de Presidencia da Xunta, limítase a crear dous postos de traballo na Secretaría Xeral de Emigración, obrigados pola LOFAXGA e integración da Fundación Galicia Emigración. CIG, CCOO e UGT abstivémonos, mentres CSIF tamén votou a favor.
Cultura crea catro postos de técnicos superiores de bibliotecas, obrigados pola falta de postos de traballo para darlle destino ao persoal de novo ingreso. Responsabilizamos a Cultura por promotora, e Función Pública por consentidora, da modificación da RPT do ano 2012 que reestructurou os postos dos museos, bibliotecas e arquivos, causando o desfase de postos. Demandamos que os postos de director/a destes centros volva a ser como antes do 2012, de concurso. CIG, CCOO e UGT abstivémonos. CSIF votou a favor.
Modificación dos programas que rexen nos procesos selectivos a corpos xerais por promoción interna e acceso libre
Función Pública da traslado da modificación dos programas, consecuencia da publicación o 2 de outubro da Lei 39/2015 de procedemento administrativo común e da Lei 40/2015 de réxime xurídico do sector público. As modificacións sairán publicadas no DOG.
Advertimos que en case todos os programas tanto de libre como de promoción interna entra a administración electrónica, sendo a normativa galega o Decreto 198/2010 que regula a Administración electrónica en Galiza e entidades dependentes. Esta normativa está afectada por normas básicas do estado (lei 11/2007 de acceso electrónico dos cidadáns aos servizos públicos e RD 1671/2009 que a desenvolve parcialmente). As referidas normas do estado están derrogadas pola nova lei 39/2015 de procedemento administrativo común. Solicitamos aclaración de que artigos do decreto galego 198/2010 seguirán vixentes a efectos de estudo.
Advertimos tamén que o V Convenio do persoal laboral é unha norma publicada e os artigos afectados pola Lei de medidas non están derrogados, senón "suspendidos na súa eficacia", demorados no seu vigor até que se derrogue a Lei de medidas. Cómpre que aclaren se entra o V Convenio íntegro, cos artigos suspendidos, ou o V Convenio realmente aplicable a día de hoxe coa Lei de medidas.
Entende Función Pública que estas dúas advertencias, xunto coas posíbeis incidencias dos cambios normativos respecto da responsabilidade patrimonial e o procedemento sancionador, poden estar efectivamente afectados por cambios normativos, pero non así a redacción dos programas, sendo responsabilidade do alumno/a estudar a materia correcta. Para evitar problemas, comprométese a Administración a que a EGAP terá en conta os posíbeis cambios normativos para a publicación dunhas guías o máis rápido posíbel.
Rogos e preguntas
Orientadores laborales para oficinas de emprego. Informan que a titulación vai ser a mesma que á vez anterior. Citacións na última semana de novembro.
Procesos selectivos corpos xerais, libre e promocion interna. As listas de libre estarán en novembro. Os exames (libre e P.I.) non serán antes do 1 de abril.
Modificacións no decreto de listas. Están a estudar as alegacións dos sindicatos. A semana que ven teremos a primeira xuntanza, e haberá mais.
RPTs paradas. Solicitamos información polo estado de diversas Relacións de Postos de Traballo paradas dende fai tempo (Medio Rural e Mar, última xuntanza o 3/2/2015, Medio Ambiente, 29/4/2015, Facenda, 12/6/2015, AGADIC, 23/7/2015, Consello Consultivo, 22/7/2015, Sanidade, 24/7/2015). Función Pública comunica que esta semana ou a vindeira estarán os decretos das estruturas das consellerías, retomando as RPTs a continuación.
Escola superior de hostelaría. Preguntamos se vai estar incluida na Axencia de Turismo. Resposta o Director de Función Pública que si estará, pero teñen que buscar encaixe ao persoal profesor.
Presenza sindical no CIXTEC. Informamos a Administración que ainda que existe notificación da Inspección de Traballo, os representantes sindicais do CIXTEC seguen a ver negada a súa participación nos asuntos para os que foron elixidos polos traballadores. Comprométese o director de función pública a instar unha xuntanza para tratar o problema.
Revisión das prazas de persoal laboral que fan tarefas de funcionario. Todas as consellerías teñen bloqueada a revisión das súas RPTs no sentido de que non corrixen a incorrecta clasificación daquelas prazas que, sendo de persoal laboral, deberían clasificarse como de persoal funcionario ocupada por laboral en virtude das tarefas que realizan. Instamos a Función Pública que tome a iniciativa para dar instrucións e fixar criterios.
Concursos escalas e administración especial. Teñen que adaptar as RPTs á nova Lei de Emprego Público, que agrupa escalas. Función Pública asegura que están a traballar na revisión das escalas, paso previo ao concurso.
Concurso Lei 17 (escalas sanitarias). Aseguraran antes do verán que sairía en setembro. Reclamamos o concurso, e a negociación no ámbito da Mesa Sectorial de Funcionarios, non da de Estatutarios como pretenden.
Temario veterinarios. Asegura Función Pública que virá a Mesa Xeral pronto. Está pendente de resposta de unha consellería.