Tralo curso organizado pola EGAP sobre o "futuro da función pública" chega agora o "futuro do Estado autónomico". Desta volta, e nun novo alarde de hipocresía, a Xunta non se priva de utilizar cartos públicos autonómicos para atacar a propia configuración autonómica galega que lle permite dispoñer deses cartos.
Nesta época de austeridade chama a atención que se detraian cartos da finalidade fundamental da EGAP, formar as empregadas e empregados públicos, para organizar cursos monográficos de adoutrinamento político aos que invitar aos amigos do partido. Entre tantas personalidades do mundo da Universidade e catedráticos destacan Carlos Negreira, Alcalde da Coruña, e Romay Beccaria, actualmente presidende do Consello de Estado. E dicimos amigos porque curiosamente, entre os 11 ponentes, non figura nin unha soa muller.
Entre resto de ponentes de "diversidade ideolóxica" atopamos na conferencia inugural a Tomás-Ramón Fernández Rodríguez, catedrático emérito da Complutense, coñecido por andar en todos os programas da TDT-party falando sobre a necesidade da reforma da constitución no título VIII, para reconducir as autonomias e retirar competencias "excesivas" que lles foran transferidas. Tamén está xa un clásico entre este tipo de cursos da EGAP, como é Roberto Blanco Valdés, unha persoa coñecida polos seus ataques á función pública galega pero que non lle fai noxos a cobrar dela.
Pero non remata a cousa aí: invitan tamén a Miguel Anxo Bastos Boubeta, liberal declarado, próximo ao partido popular e polémico onde os haxa. Famoso polas súas frases sobre que nas facultades "ensinan veleno" e "hai que sacarlle a esquerdallada da cabeza". Velaquí un elenco das súas mellores frases. Tamén está outro dos grandes clásicos do PP, Manuel Aragón Reyes, ex-maxistrado conservador do Tribunal Constitucional, que axudou ao recorte do estatuto catalán e que saía co puro naquela corrida de touros en Sevilla co resto de maxistrados conservadores nas vísperas de publicarse a dita sentenza.
Non resulta estrano que a organización desta clase de cursos vaian seguindo o camiño trazado pola FAES, fundación que marca a liña ideolóxica do PP, no sentido de atacar á función pública primeiro, logo ás autonomías e do Estado do Benestar, en xeral. O que sería estrano é que se organizase un curso relacionado cos niveis de corrupción galopante nas Administracións aproveitándose dos recursos públicos, o alto índice de fraude e evasión de capitais, a regresividade fiscal ou o nivel de infradesenvolvemento dos Servizos Públicos respecto ao que nos correspondería por PIB.
Desde a CIG, criticamos que se empreguen os recursos da EGAP para organizar actividades que non son de formación, senón de ideoloxización. Unha institución pública non pode dar unha visión sesgada á cidadanía sobre o "futuro do Estado das Autonomías". Porén, do programa do curso despréndese unha clara CENSURA da liña de pensamento oposta á RECENTRALIZACIÓN do Estado, por non dicir da defensa doutros modelos de estrutura territorial do Estado alleos ás políticas do Partido Popular. Trátase logo, dun curso partidista que debería financiar a FAES e ser desenvolto no ámbito do Partido Popular, e non a través dunha institución pública adicada á formación das empregadas e empregados públicos e pagado con cartos de todas e todos os contribuíntes.
Por último, imos solictar explicacións formais e reclamaremos o seu custo exacto, incluíndo organización, publicidade, ponencias e axudas de custe. Se queren convencernos de que recortar é o mellor, a base de repetir e repetir os mesmos argumentos, canto menos que o fagan cos recursos das persoas que se están vendo beneficiadas por esas políticas.
NOTA: O 4 de xuño publicouse no DOG a convocatoria deste curso monográfico. Posteriormente desde a EGAP deusélle reiterada publicidade a través de varios envíos aos correos corporativos das empregadas e empregados públicos da Xunta. A sesión incial terá lugar na EGAP o mércores, 19 de xuño, ás 13:30h.
