Na Comisión de Teletraballo do día 3 de decembro preguntamos ante a vaga de covid e os confinamentos de escolares, se os permisos da COVID seguían activos, pois había dúbidas do persoal en varias consellerías. Tamén propuxemos que se activase o artigo 12 polo nivel de risco alto na nosa comunidade, é máis despois de que a Unión Europea, a través do Centro Europeo para o Control e a Prevención de Enfermidades, recomende o teletraballo ante o avance desta 6ª onda.
Descartouse a aplicación do artigo 12 (teletraballo obrigatorio por emerxencia) porque neste caso non temos a declaración de Sanidade de emerxencia sanitaria e tamén porque están activos os permisos ou xustificantes para teletraballar polas causa do COVID.
Pero sempre destaca algunha consellería na súa rebeldía: Medio Rural volve a da-la nota enviando un correo ao persoal afectado no que di que hai que tirar de asuntos propios e vacacións. O mesmo nalgunha xefatura de Política Social que entende que o persoal dos centros asistenciais non ten dereitos e que non existe a posibilidade de xustificar por quedar na casa ao coidado dunha crianza confinada. E para mais estamos a falar de persoal esencial que traballou a reo durante toda a pandemia, onde primaron as necesidades do servizo e agora dáselle coa porta nas narices
E que pasa se non quedan días de asuntos propios porque xa estamos de decembro?. E si levamos varios confinamentos?. Levamos aos pequenos confinados ao traballo?
En definitiva, que algunhas xefaturas crecense denegando dereitos ao persoal e buscan calquera razón. E esta non é nin a primeira vez que se xoga cunha cuestión tan grave como a COVID poñendo en risco a todas.
Ante isto solicitamos no comité intercentros de seguridade e saúde laboral o 16 de decembro a Función Pública que aclare ás consellerías os permisos e xustificacións do PORTAX vixentes. Sorprendéronnos as declaracións da presidenta deste comité que comparou o coidado por corentena da COVID con quedarse a coidar un fillo con gripe e que polo tanto cada un que se apañe.