Chiringuitización e atomización do dispositivo contra incendios forestais

Medio Rural publicou un comunicado con avances da futura lei de incendios no que di que busca profesionalizar as brigadas mentres o que fai é afondar na división do servizo de incendios e precarizar o traballo, abocando ao persoal a vivir por debaixo do límite da pobreza. O documento non se negociou coas organizacións sindicais.

Afectan as condicións do persoal esquivando a negociación nos órganos legais de representación

Para a realización da proposta da lei de incendios contratouse á Universidade de Vigo, que elaborou unha sondaxe con grupos de traballo nos que as organizacións sindicais tiñan o mesmo peso que unha asociación ou colexio profesional, asociacións da industria ou empresariais. A CIG rexeitou participar dunha estratexia que anulaba a obriga legal da negociación colectiva a través das mesas de negociación da administración pública e incluso deixaba ao marxe as organizacións “non amigas”, e que ten como fin avalar tecnicamente as políticas da Xunta de Galiza na prevención e extinción dos incendios forestais.

En definitiva, con este procedemento opaco disfrazado de “profesionalidade”, Medio Rural saltou a negociación coas organizacións sindicais como lexítimas representantes dos traballadores e traballadoras. Para chegar ó extremo, e así avalar o seu novo Plan de Dotación de Medios, di que realizou unha enquisa a 2.500 persoas das que descoñecemos cales foron as cuestións enquisadas e a que persoal se repartiu. Na CIG opoñémonos a unha modificación non negociada dos medios e condicións do servizo.

Non se necesita unha lei para profesionalizar o servizo pero si para desmontalo

Dende a CIG sempre defendemos que a mellora do servizo e o avance para a profesionalización non dependía dunha nova lei. A Xunta tiña o mandato parlamentario de seguir as directrices emitidas logo da vaga que arrasou Galiza no 2017. Porén derivou habilmente a atención para non cumprir ou atrasar as accións de reforzo do servizo e a súa profesionalización. Agora vese claramente que coa lei o que pretenden é arrasar co Servizo de Incendios Forestais da Xunta derivandoo cara os concellos e creando un chiringuito de coordinación.

Na vez de completar a profesionalización do servizo de incendios forestais da Xunta pasando o contrato do persoal de 6 meses a todo o ano, o que fan e contratar cos concellos

Falan de profesionalización do sector, mentres que propoñen dividir o servizo de incendios reforzando e recuperando o modelo de brigadas municipais creado nos 90, pero con seis meses de traballo. Esta proposta choca frontalmente coa profesionalización, cun servizo publico único no que o seu persoal traballe todo o ano facendo prevención e labores de extinción, ben formado e equipado. É radicalmente imposible a profesionalización cun traballo de seis meses que deixa ao persoal tan precarizado que os obriga a vivir por debaixo do límite da pobreza xa que nin se achegarían ao salario mínimo en cómputo anual. Esta xa é hoxe a nosa loita, que o persoal do servizo de incendios de seis meses pase a traballar todo o ano pero a “solución “ que agora propón a Xunta e facelo dende os concellos?

Un novo chiringuito para vixiar e coordinar ás administracións

A creación dun “ente instrumental específico” para coordinar ás administracións públicas afectadas é un insulto. Esa é a función da Consellería do Medio Rural, unha vergonza inédita para derivar recursos e responsabilizar aos concellos da extinción.