A Xunta aprobou un Anteproxecto de Lei integral para a loita contra incendios na Galiza sen ter negociado na Mesa Xeral de Empregados Públicos previamente cuestións que afectan ao persoal.

O Anteproxecto de Lei de loita integral contra os incendios forestais de Galiza está agora nos trámites de participación pública na páxina de transparencia, ademais na CIG vimos de recibir a comunicación da apertura do trámite de audiencia no eido social. Porén, previamente a aprobación do anteproxecto tíñanse que ter negociado as cuestións que afectan ao persoal coa sua representación directa.

O documento da lei contén cuestións que afectan ao persoal empregado público, tanto a nivel de funcións, formación continua, competencias e estrutura, requisitos para exercer os traballos na extinción, e outras máis xerais que poñen en risco a seguridade e saúde do persoal nos lumes.

A pesar de ter un efecto directo sobre as condicións de traballo do persoal funcionario e laboral, a día de hoxe non se abriu o proceso de negociación colectiva previo coas organizacións sindicais con representación na Mesa Xeral de Empregados Públicos. Por iso a CIG-Autonómica vén de rexistrar varios escritos dirixidos a consellería e a Función Pública na que esixe a negociación colectiva dos artigos que afectan as condicións laborais do persoal ou que sen facelo directamente poñen en risco a súa seguridade.

Rexeitamos que a formación continua do persoal pase de ser obriga da administración a ser obriga dos traballadores cando agora é un dereito.

Falase de profesionalidade mentres na práctica afonda na precariedade do persoal ao seguir a permitir contratos fixos-descontinuos de 6 meses e convenios para a contratación temporal.

Dá mostra de que a Xunta non quere asumir a sua responsabilidade como administración competente en materia de prevención e extinción de incendios, botando balóns fóra. E demostra que aínda non sabe ou ignora intencionadamente as funcións das escalas dos/as axentes ambientais dos que non lles pon ben nin a denominación.

Non define ben as responsabilidades na dirección técnica da extinción e exclúe ao persoal da Xunta que hoxe ten funcións na vixilancia e detección de lumes mentres lle outorga funcións a voluntarios/as e outras entidades foráneas. E, falta unha soa referencia a conservación do patrimonio etnográfico, cultural e natural nas queimas prescritas, infraestruturas preventivas, etc: así de integral ten pouco.

O territorio non é un compartimento estanco, repartible e vendible. Unha lei integral debe protexer as persoas e o medio ambiente e o patrimonio da Galiza dos incendios forestais. E para iso é fundamental que reforce aos profesionais na prevención e lles dea seguridade e tamén que elimine a precaridade no sector. Para iso non hai outra:

 Por un cadro de persoal profesional, multidisciplinar e 100 % público!!!