A CIG ven de preguntarlle á Dirección Xeral de Emprego Público como vai afrontar a limitación a 3 anos das contratacións laborais temporais e os nomeamentos de persoal interino posteriores ao Icetazo (Real Decreto-lei 14/2021).

Este establece que para a cobertura de prazas vacantes a persoa funcionaria interina ou laboral temporal terá unha permanencia máxima de 3 anos nese posto. Porén, establécese unha excepción importante: "o persoal funcionario interino poderá permanecer na praza que ocupe temporalmente, sempre que se publicara a correspondente convocatoria dentro do prazo dos tres anos, a contar dende a data do nomeamento do funcionario interino. Neste suposto poderá permanecer ata a resolución da convocatoria."

O mesmo estipula a Lei 20/2021, pero a entrada en vigor desta cláusula que modifica o EBEP foi o 08/07/2021 co Icetazo. Dende esa data xa hai contratos e nomeamentos nos que se reflicte a limitación de 3 anos, polo que en menos de 2 meses comezarán a cesar moitas persoas temporais automaticamente, a non ser que entre en acción o mecanismo excepcional.

Tendo en conta que a excepción da que damos conta opera cando a praza ocupada por persoal interino ou temporal é convocada a través de calquera dos mecanismos de provisión e mobilidade previstos na normativa, parece obvio que neste momento, cando PRACTICAMENTE TODAS as prazas desta administración están convocadas nun ou varios deses mecanismos de provisión e mobilidade se poida considerar que é razoábel que a relación laboral se estenda ata que as prazas se cubran mediante algún dos citados mecanismos.