Esta foi a reacción á postura manifestada pola CIG de rexeitamento a dar validez tanto á proposta de plan de igualdade como de diagnose elaboradas pola Dirección Xeral de Simplificación Administrativa da Xunta antes da constitución da comisión de igualdade, que Portos puxo enriba da mesa.
A xuntanza de constitución da Mesa de Igualdade de Portos de Galiza foi, cando menos, brusca e agresiva, co beneplácito de CCOO, quen se une a todas as decisións e propostas de empresa e UGT.
Témosllo que agradecer ás persoas delegadas de UGT, central sindical maioritaria no Comité de Empresa de Portos de Galiza, que nun afán desmesurado de protagonismo, esqueceron cal é o seu rol: a defensa dos intereses do persoal, entre os que está lograr un plan de igualdade que responda ao seu propio apelativo, efectivo e descritivo da realidade laboral de Portos de Galiza; e non un plan de igualdade floreiro, rápido, copiado do da Xunta, non negociado e de mero trámite.
Nun alarde de prepotencia inaudita e de descoñecemento duns mínimos da normativa de igualdade vixente, esixíbeis a toda persoa representante legal das traballadoras e traballadores integrante dunha Mesa de Igualdade, non fixeron outra cousa máis que escenificar unha perrencha infantil de desgusto -portazos incluídos-, ante o posicionamento claro da CIG: non achantar cunha proposta de diagnose xa feita e sen negociar que incumpre a Lei, e achegar en positivo todo o posíbel para, aínda estando en minoría, poder conseguir melloras para o persoal de Portos de Galiza.
Ante a oposición da CIG a aceptar o inaceptábel (como é “negociar” unha diagnose xa feita pola Xunta); ou ante o pedimento da CIG de que conste na acta de constitución da Mesa de Igualdade de Portos a proporción de representatividade de cada central sindical (serán os/as responsábeis do resultado desta negociación e do plan de igualdade que se obteña); ou ante o pedimento da CIG dunha mínima mención ao colectivo LGTBI+...; ante todo isto, as persoas representantes de UGT perderon totalmente os papeis, ao ver que non se comunga coas súas posturas ou opinións, incapaces de respectar pareceres, achegas ou o máis mínimo comentario ou pregunta por parte da CIG ou de calquera que contraveña ou faga algunha crítica ás de UGT e empresa. Tanto é así que volveron amentar o seu vergoñento acordo UGT-CCOO adoptado por votación instada por UGT para “acollerse” ao plan de igualdade da Xunta… Como se os plans de igualdade fosen intercambiábeis e traspasábeis a calquera entidade… Acordo UGT-CCOO da vergoña, recoñecido por Portos.
Dende a CIG non podemos senón desexarlles a UGT máis tranquilidade, boa educación e maneiras, tolerancia a grandes doses, e un Aninovo cheíño de respecto cara a quen opina diferente e defende dereitos e, xunto con CCOO de Portos de Galiza, un 2025 cargado de boa fe negocial, cumprimento da Lei e moita moita moita IGUALDADE!!!
Por un I Plan de Igualdade de Portos de Galiza efectivo, negociado e axustado á realidade deste ente público!!